El xuez refuga la intervención xudicial de Bankia

Fernando Andreu, xuez de l’Audiencia Nacional, refugó la intervención xudicial de Bankia. Considera que l’alministración actual de la entidá bancaria ye distinta dafechu a la que taba al mandu cuando se cometieron irregularidaes.
 
La intervención xudicial de Bankia yera dalgo que reclamaben el Movimientu 15-M y UPyD, querellantes personaos na causa abierta por irregularidaes na xestión de la entidá. Según el xuez, nun se xustifica por evitar la continuación delictiva, yá que l'alministración actual de Bankia "ye distinta dafechu a la que taba al mandu de la entidá cuando se cometieron los fechos oxetu de la investigación", asina como que ye una entidá intervenida pol Estáu al traviés d'una entidá de derechu públicu como ye'l FROB.
 
La Fiscalía Anticorrupción opúnxose'l miércoles pasáu al pidimientu y alvirtió qu'esta midida "temeraria" pondría en riesgu a la economía estatal. El Ministeriu Públicu defendió, amás, que nengún de los dos querellantes gozaba de llexitimidá pa pidir una midida d'esti tipu. El 15-M y UPyD defendíen que la sustitución de los xestores actuales del bancu evitaría riesgos nuevos pa los aicionistes, acreedores y trabayadores, y la continuación del perxuiciu pa los afectaos. Poníen tamién de manifiesto que la intervención eliminaría'l peligru de destrucción de pruebes.