Fiscalía Anticorrupción opónse a la intervención xudicial de Bankia

La Fiscalía Anticorrupción opúnxose esti miércoles a la intervención xudicial de Bankia, como solicitaba’l Movimientu 15-M y UPyD. El ministeriu públicu considera “temeraria” esta midida al entender que pondría en riesgu la economía estatal.
 
Defendió, amás, que nengún de los dos querellantes gocia de llexitimidá pa pidir una midida d'esti tipu. Tanto los indignaos como’l partíu de Rosa Díez solicitaren la intervención al xuez de l'Audiencia Nacional Fernando Andreu, encargáu de la instrucción sobre les presuntes irregularidaes cometíes pol conseyu d'alministración antiguu del bancu.
 
Na comparecencia, celebrada pa examinar la solicitú de los dos querellantes, el xuez escuchó la declaración d'un únicu representante de Bankia y de la so matriz, el Bancu Financieru d'Aforros (BFA), miembru del serviciu xurídicu de la entidá dende mayu del 2002. Mientres la vista, que se prollongó mientres más de cuatro hores, el representante defendió la llegalidá de la xestión del bancu y esplicó que los cambios nes cuentes de la entidá –que los  querellantes interpreten como una manipulación– debiéronse de manera principal a que los sos xestores tuvieron qu’amoldase a hasta 12 cambios na regulación bancaria fechos pol Gobiernu nel añu últimu. El representante de Bankia defendió la xestión del conseyu d'alministración imputáu y añadió que les modificaciones nes cuentes nun respondieron a "un cambiu de criteriu contable, sinón a un cambiu de la estimación". "Nun esiste percepción d'error na fusión" que creó la entidá, añadió.