Ángel González sustitúi a Noemí Martín como voceru d’Izquierda Xunida na Xunta Xeneral

El Conseyu Políticu d’Izquierda Xunida (IX) decidió esti martes nomar a Ángel González como voceru de la formación na Xunta Xeneral en sustitución de Noemí Martín. Esta midida aprobóse con 65 votos a favor, 5 en contra y 6 astenciones.
 
Según informaron fontes del partíu, el coordinador xeneral d'IX d'Asturies, Manuel González Orviz, defendió la propuesta de González "pa dar respuesta a la nueva correlación de fuercies" tres l'asamblea na que resultó escoyíu. González Orviz destacó "la validez pal cargu de tolos diputaos que conformen el grupu parllamentariu nesti momentu". La decisión tomada pol Conseyu Políticu celebráu nel Auditoriu d’Uviéu con 122 persones acreditaes provoca discrepancies dientro de la coalición, como amuesa que los partidarios de Martín (31) nun votaron al entender que nun se respeten los estatutos de la organización.
 
Per otru llau, los miembros del Conseyu Políticu aprobaron por asentimientu trés resoluciones referentes a promover la reconocencia de los militantes del Partíu Comunista d'Asturies y d'IX represaliaos dende 1956 hasta la Transición, l'apoyu a les reivindicaciones de los sindicatos mineros al respeuto de la negociación per parte del Gobiernu, asina como'l futuru de la minería más allá del 2012 y les compensaciones territoriales a les zones mineres. La tercer d'elles refierse al "golpe d'estáu" de les polítiques conservadores "pa favorecer a los mercaos y poderes financieros". Tres l'asamblea d'IX, la renovación de los cargos de direición va facese nuna xunta de la presidencia tovía ensin fecha.