Asturies va tener que facer un axuste adicional de 95 y 200 millones d'euros nel 2013 y 2014

Los oxetivos de déficit nuevos marcaos pol Estáu obligue a Asturies a facer un axuste adicional de 95 y 200 millones nel 2013 y 2014, de manera respeutiva. Dolores Carcedo estimó estes cifres na so intervención na Xunta Xeneral.
 
La conseyera de Facienda y Sector Públicu esplicó que se trata, de momento, de "una estimación col escenariu actual, dao que la cifra ta suxeta a les variaciones que se puedan dar nes previsiones del PIB, los cambios nos anticipos a cuenta y la evolución económica y, poro, evolución de los ingresos, ente otres cuestiones". Estes midíes súmense a les yá previstes nel Plan d'Axuste presentáu pol Gobiernu nel Conseyu de Política Fiscal y Financiera qu'esi mesmu día modificó los oxetivos de déficit pa les comunidaes autónomes.
 
Carcedo indicó que l'Executivu va entamar la selmana próxima'l procesu de debate pa la ellaboración de los Presupuestos del 2013 cola espublización de les Normes d'ellaboración presupuestaria y la remisión al Ministeriu del techu de gastu d'Asturies. Na so comparecencia a pidimientu propiu na Xunta Xeneral, la titular de Facienda manifestó que primero qu'acabe l'actual mes de xunetu tendrán qu'enviar al Gobiernue estatal el techu de gastu que va ser la cifra que fixe'l volume de gastu non financieru del país de cara al exerciciu próximu. "Nestos momentos nun tenemos un techu de gastu zarráu", insistió la conseyera.
 
La diputada de Foro de Ciudadanos, Teresa Alonso, consideró "poco clarificadora" la información ofrecida pola conseyera, a la qu'acusó de falar con "inconcreciones y d'escudase nos axustes del Gobiernu central" como xustificación única. "Tán aplicando vustedes n'Asturies les mesmes midíes que'l Gobiernu central: recortes y más impuestos", dixo Alonso, qu'acusó al PSOE d’esmolecese namás de "facer caxa" ensin pensar nel futuru. Pela so parte, la diputada del PP, Emma Ramos, manifestó que'l sector públicu asturianu ye "nesti momentu insostenible" y pidió al Executivu que "s'axuste a la realidá".
 
Dende IX, Noemí Martín llamentó qu'a les comunidaes autónomes esíxase-yos más esfuerzu mentes que l’Estáu llogra una mayor flexibilidá per parte de la XE y indicó que nun entiende cómo se pue esixir superávit d'equí a trés años. "Tamos nun escenariu económicu complexu y, sobre manera, bien cambiante. Por eso, la nuesa principal preocupación ye la repercusión sobre l'emplegu públicu y los servicios públicos de les decisiones que se tán tomando", dixo Martín, que pidió utilizar l'aforru de la paga estra de los funcionarios en baxar l'impautu nel emplegu públicu. Mentes, el diputáu del grupu Mistu, voceru d’UpyD, Ignacio Prendes, manifestó que queden cuestiones pendientes de tratar pa poder ellaborar un presupuestu rigorosu, por exemplo la reestructuración verdadera del sector públicu.