L'escocés Fred Morrison encabeza’l cartelu del primer Folk in Grau

La Asociación La Veiga'l Cubia y la Banda Gaitas Conceyu Grau entama esti vienres un festival folk de creación nueva. Trátase de Folk in Grau, certame que nesta primer edición va contar coles actuaciones de Fred Morrison y de Skanda.
 
La Plaza va ser el sitiu onde va desendolcase esti festival, nel que tamién collabora’l Conceyu de Grau. Ésti va principiar a les 19 hores con una actuación de la Banda Gaitas Conceyu Grau, a la que siguirán Les Pandereteres. Darréu va haber un espaciu pa la tonada, cola participación del Ché de Cabaños, Mariluz Cristóbal Caunedo y José Manuel Collado Vidal, pa terminar la nueche con un conciertu del escocés Fred Morrison, que’l sábadu tamién va actuar n’Avilés –12 euros xunto a la La Bottine Souriante–, y de Skanda.
 
Xosé Antón Fernández ‘Ambás’ va encargase de presentar a toles formaciones participantes nesti primer Folk in Grau, que llega pa quedase. Dende la organización comuniquen que, alredor de les 18 hores, ta previsto un descorche de sidra y que van sortiar ente tolos asistentes al certame una estancia pa dos persones na casa rural Las Nieves, asitiada en Santu Adrianu.