Los SNL de Llaviana, Illas-Castrillón y de la Mancomunidá Ozcos-Eo continúen ensin actividá

L’Asociación de Trabayadores de la Normalización Llingüística ta acabante de denunciar la situación de los SNL de Llaviana, Illas-Castrillón y d’Ozcos-Eo. Éstos nun furrulen pese a tener aprobaes les ayudes de la conseyería.
 
“Esti añu, de los dieciséis SNL que deberíen tar funcionando sólo tienen actividá trece y eso que, dende primeros de marzu, los conceyos recibieron notificación de la Conseyería de Cultura y Deporte de que teníen aprobaes les ayudes pal mantenimientu de los SNL. A siete meses andaos del 2012 y depués de tener ingresada la subvención, nun s’entiende qué ye lo que pasa colos SNL de Llaviana, Illas-Castrillón y Mancomunidá Ozcos-Eo”, llamenta nuna nota de prensa l’asociación que xune a los trabayadores de les oficines de la llingua. La única esplicación qu’atopa pa entender la situación na que tán estos trés servicios o otros como los de Mieres, Siero o Corvera, que furrulen namái seis meses al añu, “ye la desconsideración, dexadez y falta de compromisu de los responsables de los conceyos”.
 
“Nesti momentu ta abiertu’l periodu nes que les entidaes locales soliciten subvención pa la normalización social del asturianu, polo que ye tovía más irresponsable nun tener al personal téunicu preparando proyeutos, col agravante de que la mayoría de los SNL nun cuenten con financiación del conceyu. El plazu acaba’l 30 de xunetu, colo que nos paez cásique imposible qu’esos SNL tean funcionando pa cumplir cola convocatoria de la subvención”, continúa’l comunicáu de los trabayadores. Na so opinión, la Direición Xeneral de Política Llingüística “tien que garantizar que los SNL puedan desenvolver el so trabayu nunes condiciones estables y dignes. El métodu pol que se financien estos servicios nun ye l’afayadizu y nengún añu garantizó la continuidá de tolos SNL. Esto ye una situación demostrable; basta con echar un güeyu pa lo que vien pasando munches veces nos conceyos o mancomunidaes que tienen estos servicios”. Por último, reclamen l’apertura de los SNL de Llaviana, Illas-Castrillón y Ozcos-Eo “col oxetivu de que la normalización social del asturianu y del gallego-asturianu sía un procesu activu y estable”.