Alonso: “Convivir con una llingua estremada al castellanu provoca una mayor sensibilidá hacia l’asturianu”

Pablo Alonso Alonso (Uviéu, 1980) ye un emigrante asturianu en Catalunya que s’encarga de coordinar la Banda Gaites del Centru Asturianu de Barcelona. Ente les munches actividaes qu’entama esta institución destaca la Nueche Celta.

 

 

Esti añu’l balance en cuanto a l'asistencia de públicu y al nivel artísticu de los grupos foi perbonu. Tuvimos el retu d'internacionalizar l'eventu cola actuación del grupu bretón Meliouank, unes esperiencia positiva a la qu’hai que sumar la bona acoyida que siempre tien el grupu que traemos dende Asturies. Neta edición foi la Bandina la Curuxa, que lo dio too nel escenariu y nun nos defraudó un res.

 

 

El festival nació nel 2003, en plenu espoxigue de la musica folk y de les bandes de gaites, col enfotu de facer fuera d'Asturies un eventu qu'a la llarga contara col prestixu que podía algamar cualquer festival que se ficiera en cualesquier pais del arcu atlánticu, cola torga y les dificultaes derivaes del menor arraigonamientu que tien esti tipu de musica en Cataluña pero aprobeciendo del tirón que podíemos tener por ser dalgo nuevo nestes tierres. Nos primeros años, grupos llocales como Risca l'Alba, o la formación d'Iñaki Santianes, Nerue, amenizaben les nueches, pa depués abrise a nueves formaciones.

 

 

Pues bandes asturianes como la Col.la Propinde, Verdasca, la Bandina del Oriciu Frescu, Brandal, La Bandina la Curuxa, bandes de gaites gallegues como Avoengo, bandes de folk llocales com Chudarata, Dealan, Keimpa, Dronan, Qui hi ha, Bauma, Hambrest, Invernalia, Otherside y la banda de gaites escocesa de Barcelona, Gaites Pipe of Barcelona City Band, y la banda de Gaites del Centru Asturianu de Barcelona, que tuvo presente en toles ediciones.

 

 

Pues en cuanto a númberu ye difícil de cuantificar, yá que l'entrada ye de baldre y la estensión del prau fai difícil pone-y una cifra a l'asistencia. Sicasí, podemos tar falando de qu'esti añu cerca d'un millar de persones pasaron pel prau a lo llargu del dia y de la nueche y, anque na so mayoría son socios asturianos y allegaos, tamién contamos con xente que vien del barriu onde s'asitia el centru, Sarriá, asina como xente que s'avera al eventu per primera vegada por mor d'esfrutar de la musica y de la gastronomía d'Asturies.

 

 

No que respeuta a la inversión economica y de recursos, la Nueche Celta ye, ensin dulda, na que se pon un mayor puxu por parte de la direutiva del centru. Pero eso nun queda ehí; tamien son bultables les folixes que se faen a lo llargo de tol añu, como la celebración del dia d'Asturies, Santa Bárbara, el dia del Bollu y los desfiles y collaboraciones que facemos colos centros asturianos de Tarragona, Castellón y Valencia, y con asociaciones del barriu de Sarriá y de la ciudá de Barcelona.

 

 

Unos 530, nos que predomina la xente emigrante mayor, pero na que tamién hai una bona parte de xente mozo de primer y segunda xeneración que collabora nel funcionamientu del centru, na banda o nel grupu de baille.

 

 

Tenemos la suerte de contar con unes instalaciones enforma amplies pa desendolcar diferentes actividaes culturales y deportives a lo llargo de tol añu. Contamos con dos pistes de futbol de yerba sinteticó, bolera de cuatriada, un edificiu multiusos y les oficines. Nesti edificiu últimu tamien atopamos les intalaciones venceyaes a les pistes polideportives, vestuarios y sala d'almacen de material, amás del restorán-sidrería del centru, que cuenta con una terraza con unes bones vistes al barriu de Sarriá y a Barcelona. Amás disfrutamos d’una zona de parrilles y otra más amplia del prau, onde s'asitien les piscines, la zona del merenderu colos dos horros y una réplica de la cueva de la Santina.

 

 

En cuanto a la llingua podría destacar la llectura que se fae tolos años de lliteratura n'asturianu, coincidiendo cola Selmana de les Lletres, gracies a la participación dalgunos socios del centru. Amás, dende la direutiva tiense en cuenta el valor cultural de la llingua y nunca se-y punxeron torgues al usu del asturianu tanto en cartelos de promoción d'actividaes del centru como nel so usu pa facer les presentaciones de los actos institucionales venceyaos al mesmu.Tamién fai unos años entamáronse unos cursos d'asturianu con una perbona asistencia. Anque siempre se pue meyorar n'esta estaya, nótase qu'l fechu de convivir con otra llingua estremada del castellanu como ye'l catalán fae tener a los socios una sensibilidá muncho mas favoratible pa cola llingua asturiana.

 

 

Pues la verdá ye que dende'l puntu de vista que tengo como coordinador de la banda de gaites, les rellaciones y la collaboración son perbones. Tolos años la direutiva del centru asturianu de Castellón convídanos a collaborar con ellos y colos centros asturianos del Levante pa facer una gran banda y actuar nes fiestes de La Magdalena de Castellón. Tamién ta mui recién la celebración d'un torneu de bolos ente'l centru asturianu de Torrevieja y el de Barcelona o la invitación a los nuesos paisanos de Castellón pa participar nun pasucais que se celebra tolos años dientro de les fiestes de Sarriá. Otru exemplu d’actividá conxunta ye la collaboración no musical con Tarragona pal día del Bollu.

 

 

Hasta esti añu veníase faciendo tanto’l cursu d'asturianía itinerante como’l que se fai tolos años n'Asturies pa formar profesores cualificaos pa que depués impartan les enseñances deprendíes nel cursu polos diferentes centros d'orixe. Estos dos proyeutos tán, hasta onde yo veo, conxelaos. Dende'ĺ mio puntu de vista como coordinador de la banda, veo como munches veces lo que prima ye la publicidá institucional de los actos y non la calidá artistica del enseñu, que ye a la fin lo que tien que predominar. Nun fae falta gastar sumes de perres inxentes. Munches veces cola eficiencia y, penriba too, con voluntaes polítiques, pueden salvarse les torgues y estoyos que nos imponen les dificultaes economiques nes que nos atopamos.

 

 

Na actualidá venimos siendo un númberu més o menos estable d'unos 15 componentes dientru de la banda gaites y percusión, y dientro de l'estaya de baille contamos con unes 10 o 15 persones. Lo que más nos cuesta ye caltener un númberu estable de componentes, yá que dalgunos vienen d'Asturies namái por una temporada o ye xente que, depués de vivir tola vida equí, atopa una oportunidá de tornar p'Asturies. Tamién tenemos casos de xente que nun nacieron n'Asturies y que tán tocando y deprendiendo a tocar la gaita pola atraición qu'esti instrumento tien fuera de les llendes d'Asturies.

 

 

La banda tien collaborao en numberosos actos entamaos pol propiu centru asturianu, pol Ayuntamientu de Barcelona y pol distritu de Sarriá. Tamién imparte clases de gaita y percusión selmanales, asina como les que dan los componentes del grupu de baille, y que ta abierto a tolos socios del centru y a persones que viniendo de fuera tengan ganes d’aprender dalguna de les modalidaes mencionaes. Tengo que facer un balance mui positivu en cuanto a los progresos de la banda, tanto no que respeuta al númberu de componentes como poles perspeutives y retos que tenemos nel futuru. Otra manera, prestaríame destacar la collaboración que tenemos cola banda uviedina Xácara y cola xunta direutiva del Centru Asturianu de Barcelona que nos permite contar cola uniformación de los traxes, dalgo perimportante no que se refier a la meyora estética de la banda.

 

Pa finar quixera agradecer la collaboración tanto de la xente que formamos anguaño la banda y el grupu de baille como a los que foron componentes a lo llargo de tolos años que levamos n'activu, asina como a los que vendrán, sacrificando’l so tiempu por esparder la cultura musical asturiana fuera del país.