Aprobáu por unanimidá'l Plan Económicu y Financieru de reequilibriu d'Asturies

El Conseyu de Política Fiscal y Financiera (CPFF) aprobó por unanimidá'l Plan Económicu y Financieru de reequilibriu 2012-2014 (PEF) de 498 millones d'euros presentáu pol Gobiernu d'Asturies, dempués de que l'últimu Conseyu celebráu'l pasáu 17 mayu refugara'l presentáu pol anterior Gobiernu de Francisco Álvarez-Cascos.
 
   Asina lo aseguró a la salida del CPFF celebráu nel Ministeriu de Facienda la conseyera asturiana de Facienda y Sector Públicu, Dolores Carcedo, que mostró la so satisfacción pola aprobación del Plan y confirmó que'l documentu presentáu nun recibió nenguna oxeción per parte de los miembros del Conseyu.
 
   "De primeres, les ayudes que contemplaba'l plan d'Asturies garantizaben el cumplimientu del oxetivu d'estabilidá. Trabayáramos un mes de manera intensa, intercambiando informaciones col Gobiernu Central y de primeres entendíamos que diba consideralu positivu'l Ministeriu y el CPFF", manifestó.
 
   El plan presentáu pol Gobiernu asturianu, que fixa un axuste de 498 millones d'euros, inclúi amás la subida d'impuestos como l'IRPF pa les rentes superiores a los 70.000 euros, el céntimu sanitariu, la venta de patrimoniu, la reestructuración del sector públicu autonómicu y la reprogramación de les inversiones, capítulu onde l'Executivu va gastar esti añu 325 millones menos.
 
EN CONTRA DE LOS OXETIVOS
 
    Per otra parte, Carcedo esplicó que votó en contra de los nuevos oxetivos de déficit pa les Comunidaes Autónomes establecíos por Facienda pa los dos próximos años, porque considera que la senda marcada güei pol Ministeriu "acentúa'l desequilibriu" del repartu del déficit ente l'Estáu y les Comunidaes, dempués de que Bruxeles-y concediera más marxe al Gobiernu español nel cumplimientu del oxetivu.
 
   Sicasí, quiso matizar que'l refugu d'Asturies nun ye tanto contra los oxetivos marcaos pa los próximos años sinón contra'l repartu fechu por Facienda, que consideren que tendría de ser más equilibráu. "Dao que la Unión Europea flexibilizara l'oxetivu del déficit pa España, esperábamos qu'esa flexibilidá se treslladara a les Comunidaes y a lo último nun foi asina", criticó.