La Xunta de Maxisteriu va votar la mención d'asturianu separada del restu de propuestes en sesión monográfica la próxima selmana

|

La Escuela de Maxisteriu va someter a votación la propuesta de creación d'una Mención de Llingua Asturiana nel so futuru plan d'estudios nuna sesión monográfica convocada espresamente pa esti tema, que va tener llugar a primeros de la próxima selmana, previsiblemente'l llunes. La proposición d'asturianu va votase, poro, al marxe de les otres cuatro menciones, que van dir incluyíes n'otra propuesta sobre la que se va decidir n'otra sesión diferente.
 
Fontes del personal de la Escuela de Maxisteriu y de la de Ciencies de la Educación, consultaes por Europa Press, informaron de qu'ésta foi la decisión de la direición del centru. Sicasí, la directora, Gloria López Téllez, informo güei, tamién a Europa Press, de que tovía nun hai fecha establecida.
 
Según paez, la propuesta de la direición de la escuela consta de cuatro menciones (especialidaes): Llingua Estranxera, Educación Musical y Artística, Educación Física y Educación Especial. Pela so parte, la Comisión Docente, que debe dar el preste a les propuestes pa que dempués se sometan a votación na Xunta de la Escuela, va presentar otra de Llingua Asturiana, según informó ayeri a Europa Press, Ramón d'Andrés, profesor d'asturianu en Maxisteriu.
 
Sin embargu, según otres fontes consultaes, nun va haber una única votación pal paquete completu de cinco menciones, sinón que va celebrase una sesión monográfica, previsiblemente'l próximu llunes, na que los profesores de Maxisteriu van decidir si acepten o non la mención d'asturianu.
La presentación d'una propuesta de Mención de Llingua Asturiana (especialidá compuesta d'un bloque d'asignatures que van sumar un mínimu de 30 creitos) va tener llugar tres el conceyu que tan acababantes de caltener cinco profesores que dan clase d'asturianu en Maxisteriu (Ramón d'Andrés, Roberto González Quevedo, Taresa Fernández Lorences, Xulio Viejo y Álvaro Arias Cabal), cola directora de la Escuela y col rector de la Universidá d'Uviéu, Vicente Gotor.
Los cinco docentes mostraron la so "preocupación" pola posibilidá de que los estudios d'asturianu quedaren fuera de les enseñances de Maxisteriu. Según esplicó d'Andrés, mientres el rector mostró una "sintonía total" y una "gran receptividá" hacia la propuesta, Téllez "respetó" la demanda, pero anunció que diba tener que decidilo la Xunta na votación.

Contador Estadistiques