Trés deteníos mientres les protestes nocherniegues en La Pola L.lena

La Pola L.lena foi la pasada nueche otra vuelta escenariu de les protestes de los mineros qu’acabó con trés deteníos. Ayer nueche a la colocación de delles barricaes siguió la intervención de la Guardia Civil, una actuación que ta xenerando crítiques polo desproporcionada de la mesma.

Como yá asocedió va unos díes, cuando una muyer y una neña resultaron mancaes, los incidentes empezaron sobre les 11 de la nueche cuando les fuerces de seguridá acudieron a la zona, al cortar los mineros la vía con una barricada. Según la Delegación de Gobiernu a primer hora de la mañana nun se produxeron protestes nin nuevos cortes de carretera.
 
Compromisu por Asturies pide la dimisión de Gabino de Lorenzo
 
Les sucesives intervenciones de les fuerces de seguridá nel conflictu tan xenerando malestar nes poblaciones afectaes, lo que llevó a Compromisu por Asturies a pidir la dimisión del Delegáu del Gobiernu, Gabino de Lorenzo. Según la formación asturianista "la policía cargó indiscriminadamente contra los vecinos indefensos que s’alcontraben na cai, disparando-yos pelotes de goma y llanzándo-yos gases lacrimóxenos semando un auténticu caos durante hores y convirtiendo la capital del conceyu nun estáu de sitiu no que foi una actuación policial desproporcionada, temeraria ya inxustificable".