La Universidá d’Uviéu ufre cursos d’asturianu n’Uviéu y Xixón

La Casa de les Llingües, institución dependiente de la universidá asturiana dedicada al enseñu d’idiomes, vuelve a ufrir pal cursu 2012-13 un cursu d’asturianu correspondiente al nivel A1, el más básicu dientro de los niveles qu’afita la UE pal deprendizaxe d’idiomes.

El cursu, de 90 hores y que va desarrollase ente’l 1 d’ochobre de 2012 y el 31 de mayu de 2013, va impartise n’Uviéu los llunes y miércoles, de 17:30 a 19:00 hores y los martes y xueves en Xixón de 19:30 a 21:00 hores.
 
Según conseña’l programa cursu, los oxetivos del mesmo van ser que l’alumnu sía quien a “intervenir, responder y cooperar de manera cenciella nos contestos comunicativos más habituales, de captar el sentíu global de mensaxes orales breves, de comprender de mou global testos escritos, de producir mensaxes breves y coherentes orales y escritos en diferentes situaciones y de remanar léxicu y espresiones nes situaciones más corrientes”.
 
Amás d’asturianu, la Casa de les Llingües ufierta 94 cursos n’otres 11 llingües: alemán, árabe, chinu, francés, inglés, italianu, xaponés, llingua de signos española, polacu, portugués y rusu.