Migoya destaca "el bon clima de trabayu" y el "entendimientu total" con IU nos 100 díes de gobiernu en coalición

La conseyera d'Alministraciones Públiques y Vocera del Gobiernu del Prinicipáu, Ana Rosa Migoya, destacó güei'l "bon clima de trabayu", el "entendimientu total y la convivencia normal dafechu" col so sociu de Gobiernu, IU-BA-Verdes, nos cien primeros díes dende que se firmare l'acuerdu de gobiernu ente dambes formaciones. Migoya destacó que l'aprobación de los presupuestos "foi sin duda la decisión de mayor caláu".
 
Migoya, entrugada na rueda prensa tres el conseyu de Gobiernu pol balance que fai'l PSOE d'esti acuerdu, aseguró que "nun se fizo un balance de los 100 díes", pero indicó qu'algamar un acuerdu foi "positivo" porque permitió al Executivu cumplir el so oxetivu que yera buscar la estabilidá política.
 
"Nun buscábamos la estabilidá política como un fin en sí mesmu sinón pa garantizar que se tomen midíes necesaries p'Asturies con mayoría bastante", dixo Migoya, que se refirió a l'aprobación de los presupuestos como la principal decisión que pudo ser una realidá gracies a dichu acuerdu de Gobiernu.
 
Sobre les numberoses crítiques del diputáu d'IU-BA-Verdes, Francisco Javier García Valledor, Migoya repitió que diches discordancies "respuenden a frustraciones de carácter personal y non a un plantegamientu políticu del so partíu".
 
"Resulta chocante y hasta ciertu puntu insólitu qu'un diputáu parlamentariu tea pidiendo la disolución del partíu al que pertenez y les crítiques al Gobiernu respuenden amás a eso, a cuestiones de carácter personal, porque nun hai nengún problema nel senu del Gobiernu, sinón tolo contrario, una collaboración mui granible", acabó Migoya.