Compromisu celebra’l Conceyu Fundacional con una participación de 300 persones

L’Auditoriu d’Uviéu acueye esti sábadu, dende les 9.30 hores, el Conceyu Fundacional del procesu Compromisu, nel que participarán unes 300 persones. Los presentes van escoyer el nome de la organización y la so Executiva.
 
Hasta la medianueche de güei, les persones apuntaes nel censu y los militantes de Bloque por Asturies y Unidá Nacionalista Asturiana (UNA), organizaciones impulsores d’esti procesu que pretende axuntar a tol asturianismu, tienen pa escoyer trés nomes y sigles ente les 23 presentaes pa denominar a la organización. Mañana escoyeráse ente les más votaes la definitiva d’esti proyeutu que tien les so bases na defensa del país, la xusticia social y l’ecoloxismu.
 
Según l’axenda anunciada por Compromisu, los participantes nel Conceyu Fundacional, que va principiar a les 9.30 hores, en primera convocatoria, y a les 10, en segunda, van poder recoyer l’acreditación y la documentación a les 9 hores. L’orde del mesmu va ser el siguiente: escoyeta de la mesa, llectura del Reglamentu del Congresu y votación (10.15 hores), enmiendes a la ponencia política y votaciones (10.30 hores), enmiendes a la ponencia estatutaria y votaciones (12.30 hores), xinta (14.30 hores), presentación y defensa de les propuestes pal nome de la Federación (16 hores), presentación y defensa de candidatures (16.30 hores), votación d’Executiva (17 hores), presentación de persones o de candidatura a la Xunta (17.30 hores), votación de la Xunta (18 hores) y proclamación de los muérganos de direición (18.30 hores).