El bretón pierde más de 70.000 falantes en diez años, un 30% del total

La llingua bretona puede tar viviendo les sos últimes décades como llingua viva según los datos qu’ufre l’últimu estudiu sobre esti idioma asoleyáu pol sociollingüísta Fañch Broudic y tituláu “On parle encore breton au XXIe siècle” (“Falamos bretón entá nel sieglu XXI”). La encuesta d’usu y conocimientu de bretón recoyida nel llibru afita que nel 2007 quedaben 172.000 falantes, mientres qu’hai diez años yeren 246.000.

L’estudiu de Broudic, según los datos asoleyaos nel diariu Ouest France, afita qu’ente 1997 y 2007 el númberu de falantes baxó un 30 %, pasando de 246.000 a 172.000 les persones que declaren falar bretón. Según conseña l’autor “por primer vez na zona tradicionalmente falante de bretón, el númberu de falantes ye inferior a 200.000”.

Namás que 35.000 bretones usen l’idioma a diariu

La zona tradicionalmente falante comprende los departamentos del oeste, Finistère y la parte occidental de Côtes-d'Armor y de Morbihan, lo que se conoz como la Baxa Bretaña. Nesta zona 3 de 4 habitantes dicen nun comprender el bretón, mientres que na llamada Alta Bretaña (departamentos d’Ille-et-Vilaine, Loire-Atlantique y la parte oriental de Morbihan y Côtes-d'Armor), namás que ye’l 2% de la población la qu’entiende la lllingua del país.

Na Baxa Bretaña, el 22 % de les persones preguntaes entiende’l bretón. Sicasí, namás un 13 % lo falen (frente al 20 % d’hai diez años), polo que un 9 % d’aquellos que lu entienden nun lo falen. Amás solo 35.000 falantes usen la llingua a diariu, mientres qu’un 11% de les persones capaces de falala nun la usen nunca.

El falante mediu de bretón: muyer mayor de 60 años y habitante de la zona rural del oeste del país

A estos datos preocupantes pal futuru súmase que’l “falante mediu” ye, según Broudic, una muyer de más 60 años, casada, con estudios básicos, habitante de la zona rural de Finistère. Otru datu negativu ye que son namás 12.000 les persones d’ente 15 y 40 años los falantes, mientres que los mayores de 60 años sumen 120.000. Estos representen el 70 % de los falantes.

Por variedaes del bretón, un 39 % declaren falar cornouaillais, un 19 % el trégorrois, un 16 % el léonard, y un 14 % el vannetais.

L’únicu datu esperanzador: aumentó llixeramente’l númberu de falantes nel tramu d’edá de 15 a 19 años.

Si sigue la tendencia actual, nel 2017 habrá namás que 122.000 falantes, lo que supón una baxada del 29 %. Sicasí, hai un datu esperanzador pa la supervivencia de la llingua: el porcentaxe de mozos de 15 a19 años falantes de bretón subió del 1 al 4 % nestos diez años. Anguaño hai 12.300 alumnos billingües bretón-francés y entre 5 000 y 6 000 alumnos más escoyeron voluntariamente l’asignatura de llingua bretona na enseñanza secundaria.