El Seminariu de Filoloxía Asturiana espera poner al día la so revista pa finales d'esti añu

Xulio Viejo Fernández, direutor de la revista de Filoloxía Asturiana, anunció qu’espera poner al día la espublización pa esti añu cola salida de los númberos 11 y 12. El Seminariu presentó n’Uviéu los que van del 6 al 10 y dos llibros.
 
Nel actu, que tuvo llugar ayeri nel Club de Prensa Asturiana de La Nueva España, tamién participaron Ramón d’Andrés, coordinador del Seminariu de Filoloxía Asturiana (SFL) y María Paz Suárez Rendueles, vicerrectora d’Investigación y Campus d’Escelencia de la Universidá d’Uviéu, que foi la primera en tomar la pallabra tres una introducción breve al actu del actual presidente de la Fundación Caveda y Nava. Na so intervención, felicitó a los autores y animólos “a siguir cola xera investigadora, a vegaes difícil, pero siempre gratificante”. “Ye importante pa nós, la Universidá d’Uviéu, que salga a la lluz el trabayu fechu polos investigadores y que llegue a la sociedá”, continuó Suárez Rendueles, que destacó’l llabor importante que fai pa ello la platoforma dixital de la universidá asturiana Reunido, onde se pue consultar y descargar de baldre la revista de Filoloxía Asturiana y otres munches de dellos ámbitos. Por último, fixo referencia a la importancia de la llingua asturiana, “filo conductor del Seminariu”, como patrimoniu cultural d’Asturies.
 
D’Andrés, pela so parte, encargóse d’esplicar los detalles de los dos llibros que se presentaben ayeri, anque enantes fixo una esplicación sobre lo que yera’l SFL y el so llabor, con proyeutos d’investigación como ETLEN o AsturNeo; d’estudios de sintaxis dialeutal, como ESLEMA; y l’entamu de congresos, cursos y conferencies. Los dos volumes coleutivos espublizaos pol Seminariu nacieron precisamente de dos congresos, celebraos nel 2006 y nel 2010. El primer d’ellos ye ‘Cien años de filoloxía asturiana’, llibru coordináu por Viejo que recueye les contribuciones al seminariu sobre'l centenariu de ‘El dialecto leonés’, de Ramón Menéndez Pidal. Son diez trabayos d’investigadores d’universidaes de tol Estáu que trata de llingüística.
 
Mentes, el segundu, toca un tema que trespasa l’interés de la propia llingüística, como ye’l tema de les fronteres ente dominios o árees llingüísitiques visualizaes nun mapa. ‘Lengua, ciencia y fronteras’, coordináu por D'Andrés, ye’l nome d’esti llibru que tien orixe nel congresu celebráu n’ochobre del 2010 y nel que, además de filólogos, tamién participaron filósofos, biólogos y antropólogos. “Ye un volume mui interesante nel que nun hai una sola doctrina, sinón delles”, esplica’l tamién coordinador del SFL. En total son 17 trabayos, de los que cinco tán nun CD qu’acompaña’l llibru.
 
Númberos nuevos de la revista
 
L’últimu en tomar la pallabra foi Viejo, que faló sobre los anicios de la revista a finales de los 90, anterior al propiu Seminariu, que siguía los pasos de la Biblioteca de Filoloxía Asturiana qu’entamó una década enantes Juan Carlos Villaverde Amieva. El direutor de la espublización detalló les participaciones de los númberos del 6 al 10, dividíos en dos volumes. El primeru, qu’inclúi del 6 al 8, ye’l que supunxo un saltu de calidá a la revista por mor del homenaxe que dende’l Seminariu quixeron dar a Diego Catalán Menéndez-Pidal tres la so muerte, contando con collaboraciones y análisis de detacaos investigadores, a lo qu’hai que xunir un cambiu de formatu. Darréu, Viejo espuso les collaboraciones del volumen colos númberos 9 y 10 y anunció qu’esti añu “esperamos poner al día la revista” cola espublización conxunta del 11 y 12.


Na semeya, D'Andrés, Suárez Rendueles y Viejo.