Les persones que quieran tener voz y votu nel Conceyu Fundacional del procesu Compromisu tienen hasta esti domingu p’apuntase al censu. El sábadu 23 de xunu ye la fecha na que va tener llugar el congresu.
 
Les persones que s’incorporen depués del domingu sí van poder asistir al Conceyu Fundacional del procesu Compromisu, impulsáu dende Bloque por Asturies y Unidá Nacionalista Asturiana (UNA), anque nun van poder votar. Hai que recordar que la militancia d’estes dos formaciones tienen derechu a decisión el 23 de xunu y que’l censu ta abiertu namái a independientes. Nesi sen, los impulsores de Compromisu destaquen l’aceptación alta que ta teniendo’l procesu ente l’asturianismu y ecoloxismu, con más de doscientos inscritos.
 
Toles persones que van participar nel Conceyu Fundacional van recibir, a partir del martes, la ponencia marcu coles enmiendes incorporaes recién. Mentes, dende’l miércoles hasta’l 19 de xunu va abrise un periodu nuevu d’enmiendes esclusivamente parciales pa que pasen de forma direuta al congresu, pa lo que ye necesario l’apoyu d’al menos 5 persones apuntaes nel censu. El 22 de xunu ye la fecha llende pa unviar les ponencies y les enmiendes definitives. Hasta'l xueves, cuando terminaba'l primer plazu pa la presentación d'enmiendes, llegaron más de cien.