Un programa de radio va informar sobre les noticies del movimientu de reivindicación llingüística

Delles emisores van incorporar a la so programación un espaciu que va informar sobre l’actualidá del movimientu de reivindicación llingüística. Iniciativa pol Asturianu promueve esti programa que tamién va poder sentise per Internet.
 
‘Iniciativa pol Asturianu nes ondes’ ye’l nome que va llevar esti programa mensual d’una hora de duración del que va ser responsable Samuel Gradín, periodista con una esperiencia amplia tres el so pasu per La Voz de Galicia y la RPA. Nél van dase a conocer toles noticies d’actualidá del movimientu de reivindicación llingüística y de les actividaes qu’entame la organización que trabaya na normalización del idioma. Tamién va haber sitiu pa entrevistes, música y una seición p’aprender asturianu.
 
Les emisores que van sumar esti espaciu a la so programación son, de momento, Radio Sele, Radio Ujo y AllerFM, anque se mantienen negociaciones con otres cadenes radiofóniques pa tratar de llegar a la mayor audiencia posible. Amás, tamién van colgase los programes n’Ivoox pa la so escucha o descarga. Tovía nun se conocen los horarios del primer ‘Iniciativa pol Asturianu nes ondes’, que va incluyir una entrevista a Inaciu Galán, presidente de la organización, que va falar de los seis primeros meses de vida d’Iniciativa pol Asturianu; y otra a Denis Soria, vocal de dominiu llingüísticu, que va tratar sobre les rellaciones entamaes con otros coleutivos de Lleón, Zamora y Miranda do Douro.