Los llectores d’Asturies.com califiquen de mala la política llingüística desendolcada por Foro

Un 72 por cientu de los usuarios d’Asturies.com califica de mala la política llingüística desendolcada pol Gobiernu de Foro. Sicasí, un 19 por cientu de los llectores que votaron esta opción considera qu’ameyoró lo fecho por executivos anteriores.
 
Mentes, un 21 por cientu de los llectores que votaron nel nuesu ‘Conceyu Abiertu’ valora como bono lo fecho nesta materia pol partíu de Francisco Álvarez-Cascos, anque un 13 por cientu cree que pudo facer más. Alfredo Ignacio Álvarez Menéndez foi’l direutor xeneral de Política Llingüística del Executivu de Foro, cargu que taba baxo’l mandu del conseyeru de Cultura y Deporte, Emilio Marcos Vallaure. La so sustituta nel cargu tres la entrada del PSOE nel Gobiernu ye Ana González, que tamién incorpora la cartera d’Educación. Tovía se desconoz si los socialistes van mantener la direición xeneral de Política Llingüística al igual que fixo en llexislatures anteriores.  
 
Por último, un 6 por cientu de la xente que participó na encuesta escoyó la opción ‘Nun sé’. Dende esti mesmu momentu ta abiertu a disposición de los nuesos llectores un ‘Conceyu Abiertu’ nuevu. Nesta ocasión queremos saber la so opinión sobre les movilizaciones entamaes polos mineros pola mengua de les ayudes estatales al sector.