Les escueles de Ḷḷena celebren el Día del Mediu Ambiente trabayando con materiales n’asturianu

Esti martes, 5 de xunu, ye’l Día Mundial del Mediu Ambiente. Coincidiendo con esta fecha, los escolinos y escolines de Ḷḷena van trabayar a lo llargo de la selmana sobre les conductes ecolóxiques al traviés de materiales didáuticos n'asturianu.
 
Esta campaña, promovida pol Serviciu de Normalización Llingüística del conciyu, céntrase de forma especial no que ye la seleición de basura y el so reciclaxe. Los materiales son unes lámines-xuegos que los alumnos y alumnes han de recortar pa crear unos roscos nos que dir encaxando los residuos que xeneramos tolos díes nel so correspondiente contenedor. Amás, la lámina inclúi otra actividá de manualidaes como’l reciclaxe de tetrabrick nuna cartera prestosa.
 
Les persones que quiera conocer los materiales colos que tán trabayando los profesores en Ḷḷena van poder facelo nunos díes al traviés del apartáu de Política Llingüística de la web del conciyu. Dende’l Serviciu de Normalización destaquen que nestes actividaes que tán desendolcándose esta selmana nes escueles ḷḷenices por mor del Día Mundial del Mediu Ambiente participa tol alumnáu, non sólo los escolinos y escolines de Llingua Asturiana, anque’l nivel de matriculaos na materia algama casi’l 100 por cien en dalgunos centros.