Marisa Valle Roso va llevar ‘De lo fondero l’alma’ per toda Asturies

Esti martes va tener llugar en Ciañu la presentación de la xira ‘De lo fondero l’alma’ de Marisa Valle Roso, nome que recibe tamién el so primer trabayu en solitariu. La cantante de tonada va tocar esti mes en Llanes, L’Entregu, Cangas y Mieres.
 
‘De lo fondero l’alma’ trátase d’un discu nel que Marisa recueye los cantares más representativos del repertoriu qu’utilizó nes sos actuaciones de los últimos años, destacando l’amplia variedá d’estilos dientro la canción asturiana: canción al altu la lleva, arrieres, ayeranes, d’autor o vaqueira, ente otres. Nél disfrutó de la collaboración de Pablo Carrera (gaita), Xaime Arias (pianu), Rodrigo Sturm (guitarra) y Estefanía Moro (percusiones tradicionales). Los trés primeros van participar nesta xira xunto a la llangreana nel que van poder sentise los cantares d’esti trabayu.
 
El primer conciertu va tener llugar el sábadu nel IES de Llanes, pa continuar coles actuaciones el xueves 14 nel Teatru L’Entregu, el vienres 22 nel Teatro Toreno de Cangas del Narcea, y el llunes 25 nel Auditoriu Teodoro Cuesta de Mieres. Tolos conciertos van principiar a les 20.30 hores y van tener un preciu únicu de 5 euros. La xira ‘De lo fondero l’alma’ va presentase mañana al meudía nel Centru de Referencia de la Cultura y la Llingua Asturiana, asitiáu na Casa los Alberti de Ciañu, con un actu nel que va participar la cantante llangreana y el músicu Pablo Carrera en nome de Producciones A Mansalva, empresa organizadora de la xira, amás d’un representante por confirmar del Conceyu de Llangréu.