Les seleiciones catalanes van poder competir en disciplines que nun tengan federación española

El Constitucional tornó un recursu d’inconstitucionalidá contra un artículu de la Llei d’apoyu a les seleiciones catalanes del Parlament. D’esta forma, Catalunya va poder competir de forma oficial en disciplines que nun tengan federación española.
 
L'artículu que recurrió'l Gobiernu hai más d’una década, en payares del 1999, señalaba que les federaciones deportives catalanes de cada modalidá deportiva "son les representantes del respeutivu deporte federáu catalán nos ámbitos supraautonómicos", un preceptu que l'Abogáu del Estáu consideraba inconstitucional y qu'invadía competencies estatales en materia de rellaciones internacionales y de cultura. El lletráu consideraba que'l fechu de que Catalunya tenga la competencia esclusiva en deporte nun torga que l'Estáu pueda "exercer y desarrollar dafechu" les competencies que, en virtú d'otros títulos, correspuenden al Estáu y que calquen sobre la materia. Pela so parte, l’abogáu del Parlament y el de la Generalitat defendíen la constitucionalidá del preceptu y la compatibilidá de la representación que s'otorga a les federaciones catalanes –en cuantes que non esclusiva– cola que se reconoz a les federaciones españoles na Llei del Deporte, que nun se pronuncia sobre l'actuación de les federaciones autonómiques nel ámbitu internacional.
 
Según la sentencia del tribunal, l'artículu ye constitucional "siempre que se trate de deportes nos que nun esistan federaciones españoles y que, en nengún casu, se torguen o alteren les competencies del Estáu de coordinación y representación internacional del deporte español". Tamién recuerda que la norma recurrida, al contrario que la de les seleiciones vasques, nun contién referencia dalguna al caráuter esclusivu o escluyente de la representación que s'atribúi a les federaciones catalanes n'ámbitos supraautonómicos.
 
Pal Constitucional, la concepción universal del deporte que recueye'l preámbulu de la llei catalana "non necesariamente implica una invasión de la competencia estatal en defensa de los intereses xenerales del deporte federáu español nel so conxuntu, nin necesariamente la cuestiona o la condiciona". Por ello considera que'l preceptu impugnáu tien que lleese nel sentíu de que la representación internacional del deporte federáu catalán poles federaciones catalanes ye constitucional siempre que nun se produza "confluencia d'intereses colos mesmos del deporte federáu español nel so conxuntu".
 
Según la sentencia, "les federaciones catalanes van poder participar de forma direuta n'eventos deportivos internacionales siempre que nun confluya l'interés nacional del que ye portador el deporte federáu español y l'interés propiu de l'autonomía na proyeición esterior de la so actividá deportiva", con respetu a establecer na normativa estatal y los estatutos de la federación internacional que se trate.