Valledor diz qu’hai que crear una nueva fuerza política “d’izquierdes, asturianista, ecoloxista, republicana y altermundista”

El diputáu d’IX-BA-LV, Francisco García Valledor, señaló qu’“hai que disolver IU, el Bloque y Los Verdes pa crear una fuerza qu’axunte a tola izquierda alternativa al PSOE”, una nueva fuerza política “d’izquierdes, asturianista, ecoloxista, republicana y altermundista”, llamando amás a UNA y a Izquierda Republicana a participar nel proyectu. Dende la federación nacionalista respuenden que "yá existe una fuerza asturiana, ecoloxista y d’izquierdes, la UNA”.

El diputáu d’IX fixo estes declaraciones nuna entrevista nel diariu La Nueva España. Nella conseñó que debe fundáse “una fuerza política asturiana que parta de la iniciativa Izquierda Unida-Bloque por Asturias-Los Verdes, que llame a participar nella a otres fuerces menores, como UNA o Izquierda Republicana, y sobre too a una parte de la sociedá asturiana que nun se siente representada en nenguna fuerza d’esi espaciu. Una fuerza d’izquierdes, asturianista, ecoloxista, republicana y altermundista, que tenga posición nel mundu y qu’aspire a tener un doble espaciu federal n’España y n’Europa”.
 
Asimesmo comentó qu’“habría que disolver los tres partíos qu’integren la coalición (en referencía a IU-BA-LV) y habría un momentu simbólicu pa facelo, el 75.º aniversariu de la Revolución d’Ochobre, que se celebra esti añu. Habría que facer un congresu fundacional y ufrir una participación compensada, pa que les partes menores nun se sintieren absorbíes pola mayor”.

Una de les fuerces polítiques nombraes por Valledor, Unidá Nacionalista Asturiana, respondió a les sos palabres al traviés del so portavoz, Faustino Zapico, señalando que “yá existe una fuerza  asturiana, ecoloxista y d’izquierdes, la UNA”.

Zapico desixó al “diputáu asturianu Valledor que nun utilice a la nuesa organización como elementu de debate dientro d’IU" y pidió-y que "les carencies en términos de compromisu asturianu, ecolóxicu y social del so partíu, que vemos que cada día rescamplen más incluso pal propiu Valledor, sían trataes internamente, ensin utilizar a la nuesa organización y ensin interferir nel procesu d’unificación de la izquierda nacionalista y verde que se ta produciendo n’Asturies alredor d’UNA".