Reivindiquen nun manifiestu'l 25 de mayu como una fecha histórica p'Asturies y denuncien el so escaezu

|

Siete coleutivos reivindiquen nun manifiestu'l 25 de mayu como una fecha clave na historia del pueblu asturianu. Denuncien “la manipulación histórica y l'esborramientu identitariu fechu demientres sieglos pol sucursalismu español”.
 
Mañana cúmplense 204 años de la proclamación de soberanía de la Xunta Xeneral y el llevantamientu n’armes del Exércitu Popular Asturianu contra les tropes de Napoleón. Una fecha histórica na nuesa historia que pasa desapercibida añu tres añu poles autoridaes del país y que muncha xente desconoz por mor del escaezu a la que se vien sometiendo dende hai décades. Coindiciendo cola cercanía d’esta celebración, Bloque por Asturies-Unidá Nacionalista Asturiana (UNA), Bloque de la Mocedá Asturianista, Xunta Cultural Rebelgu, Axenda Alternativa Asturiana, Darréu, Asociación Cultural N'Ast y Andecha Astur roblaron un manifiestu pa facer alcordanza del 25 de mayu y reivindicalu como un momentu históricu na milenaria historia del nuesu país.
 
“Un 25 de mayu del 1808 foi proclamada la soberanía asturiana nel contestu de la invasión bélica francesa. Entós la Xunta Xeneral d’Asturies proclamose soberana dafechu, como consecuencia de la movilización y presión d’unes clases populares que tomen la pallabra como actores políticos n'arena pública, siendo asina demientres esi periodu la institución política cimera d'esti país, ensin nenguna interferencia d’instituciones foriates. Asina, la Xunta Xeneral asumió tolos atributos de poder soberanu: entamó l'Exércitu Popular Asturianu, que lluchó hasta la victoria escontra les fuercies de Napoleón; foi creada la la bandera de la nuesa patria; y foron unviaos embaxadores internacionales a Inglaterra p’algamar un alcuerdu de collaboración d’estáu a estáu contra’l común enemigu francés”, recuerden nel manifiestu, pa depués denunciar que “esi 25 de mayu del 1808 ta escaecíu pol pueblu asturianu gracies a la manipulación histórica y l'esborramientu identitariu fechu demientres sieglos pol sucursalismu españolista”. Un escaezu que, entienden que nun ye por casualidá, sinón que “respuende a los intereses de les élites oligárquiques asturianes y del estatalismu español afitáu dientru y fuera d'Asturies”.
 
Por esti motivu, los coleutivos firmantes reivindiquen que “esti día sía reconocíu pola so importacia histórica” y esixen que “los conceyos y la Xunta Xeneral entamen actividaes de celebración, recuperación histórica y reivindicación del 25 de mayu como’l día nel que les asturianes y los asturianos, arguyosos del so país y amando la llibertá, proclamaron la soberanía de les sos instituciones nacionales por mor de la llucha ya axitación popular”. Por último, denuncien los movimientos últimos fechos pol Gobiernu del Reinu d’España, “que sigue coles imposiciones y quier emplegar a Asturies como llaboratoriu de prebes pa una recentralización del Estáu, lo que fai que l'espíritu y el valor del 25 de mayu como día clave pa una Asturies que quiera decidir por sí mesma siga siendo pernecesariu y clave pal nuesu futuru”.

Contador Estadistiques