Javier Fernández, proclamáu presidente d’Asturies

El socialista Javier Fernández ye dende esti miércoles presidente d’Asturies. El mierense resultó escoyíu por mayoría absoluta gracies a los votos d’Izquierda Xunida y d'Unión Progreso y Democracia, sumando un total de 23 apoyos.
 
Pela so parte, Foro de Ciudadanos, con 12 diputaos, y Partido Popular, con 10, astuviéronse nesti trámite nel que nun se pue votar en contra. Fernández convirtióse asina nel octavu presidente del país y xefe del Executivu na novena llexislatura rematando'l procesu entamáu coles eleiciones antemanaes del 25 de marzu. El tamién secretariu xeneral de la Federación Socialista Asturiana (FSA) sustitúi nel cargu al presidente de Foro, Francisco Álvarez-Cascos, depués de la llexislatura más corta de la historia de la democracia asturiana, na que la falta d'alcuerdos ente'l Gobiernu y la oposición y el refugu a los presupuestos llevaron al ex ministru de Fomentu a convocar eleiciones meses depués de les ordinaries.
 
Pa salir investíu, el presidente socialista pautó un alcuerdu de llexislatura con UPyD y un alcuerdu d'investidura con IX, formación que va decidir mañana en referéndum la entrada o non nel Executivu nuevu. La toma de posesión de Fernández, qu'agradeció l'apoyu llográu y llamentó nun poder adelantar la composición del Gobiernu nuevu, va celebrase esti sábadu na Xunta Xeneral.