Fernández asegura que va oponese a los zarros nos sectores mineru, metalúrxicu y naval

El candidatu únicu a presidir Asturies, el socialista Javier Fernández, aseguró nel so discursu de la primer sesión del Plenu d’Investidura que va oponese a los zarros na minería, el sector metalúrxicu y el naval. IX va negociar entrar nel Gobiernu.
 
El líder la de FSA-PSOE alvirtió que’l so gobiernu va oponese "de manera serena y enérxica" a cualquier plantegamientu de zarros como’l qu’afeuta al sector mineru “col brutal recorte de les ayudas al furrulamientu", asina como a la cancelación de la política de compensación a les zones más deprimíes, "como les cuenques". Fernández, inxenieru de mines de formación, destacó la conveniencia de qu’estos sectores tradicionales, a los que sumó la metalurxa y el naval, se complementen cola apuesta pola diversificación y la innovación.
 
Tamién en materia económica anunció la puesta en marcha d’un plan de puxu a la competitividá agraria y ganadera, que son, xunto a la forestal, dos de los activos más importantes de la economía nacional. Amás, indicó que la FSA-PSOE va dedicar tolos recursos disponibles pa liderar un turismu que la identifique.
 
Ente otros munchos asuntos, Fernández tamién destacó que’l so grupu parllamentariu va impulsar, tres les conversaciones con UPyD, una comisión d'investigación nel Parllamentu asturianu sobre'l 'Casu Marea', la trama presunta de corrupción qu'afeutó al Gobiernu socialista de Vicente Álvarez Areces. Tamién reconoció que va aplicar recortes y axustes, pero non "una austeridá abrasiva" onde namás prime'l principiu de sálvese "quien pueda". Nesti sen, señaló que la orientación progresista y socialdemócrata" del so Gobiernu va ser inequívoca y que nun va almitir "l'esguace" del estáu del bienestar.
 
IX podría entra nel Gobiernu
 
El Conseyu Políticu d’Izquiera Xunida d’Asturies aprobó abrir un procesu de negociación cola FSA pa entrar nel Gobiernu del país por 57 votos a favor, 37 en contra y trés astenciones. La decisión, adoptada ayeri n’Uviéu, significa qu’esti xueves los militantes de la formación decidirán nes asamblees llocales, al traviés d’un referéndum, si la coalición participa o non nel Executivu. Otra manera, Jesús Iglesias va optar a ser senador pola Xunta Xeneral en representación de la formación.