La enseñanza pública para esti martes en toles sos etapes, dende Infantil hasta la universidá

Esti martes ye día de fuelga na enseñanza pública. Toles etapes educatives, per primer vegada en Democracia, faen un parón xunitariu a nivel estatal pa protestar polos recortes que’l Gobiernu de Mariano Rajoy entama nel sector.
 
N’Asturies, tán llamaos a la fuelga 150.000 alumnos y 15.000 profesores d’Infantil, Primaria, Secundaria, Bachilleratu, Formación Profesional y universidá. Con esta iniciativa, los sindicatos educativos pretenden defender el sector públicu y amosar el so refugu a la mengua del 21 por cientu nos Presupuestos Xenerales del Estáu pal sector y les midíes d’aforru previstes pol Gobiernu de Mariano Rajoy que namái nel nuesu país pue dexar na cai a 500 interinos.
 
Aprovechando la primer sesión del Plenu d’Investidura, cientos de docentes y estudiantes vistíos con camisetes verdes, color que simboliza la defensa de la educación pública, axuntáronse a primer hora de la mañana frente a la Xunta Xeneral pa protestar. La popular Mercedes Fernández foi recibida con pitos a la so llegada al Parllamentu asturianu. Esta tarde, a les 19 hores, ta prevista a una manifestación n’Uviéu contra los recortes n’educacación, con salida de la Estación del Norte, na que s’espera un gran asistencia de xente.
 
Otra manera, el Movimiento Social por la Escuela Pública tamién convocó esti meudía en Xixón, frente al IES Calderón de la Barca, una concentración pa protestar pola paralización d'obres y proyeutos nos centros públicos.
 
Na semeya, momentu de la llegada de Mercedes Fernández a la Xunta Xeneral.