El Nomenclátor Xeográficu de Toponimia Oficial del Principáu d’Asturies yá ta disponible na rede

Política Llingüística presentó’l Nomenclátor Xeográficu de Toponimia Oficial del Principáu d’Asturies que permite un accesu rápidu a los nomes de llugar oficiales. Ésti yá ta disponible na rede colos datos correspondientes a Xixón.
 
El direutor xeneral de Política Lingüística del Principado, Alfredo Álvarez Menéndez, encargóse d’esplicar los detalles d’esti proyeutu de catalogación, cartografiáu y xerarquización de los nomes oficiales de les entidaes de población según consten nos Decretos d’Oficialización aprobaos pol Conseyu de Gobiernu y espublizaos nel BOPA, xunto al direutor xeneral d’Ordenación del Territoriu y Urbanismu, José Miguel García Arias, y del téunico del Centru de Cartografía, Alexis López Quintana. El Nomenclátor desarrollóse gracies al llabor d’un equipu integráu por téunicos de la Direición Xeneral de Política Llingüística y del Centru de Cartografía dependiente de la Direición Xeneral d’Ordenación del Territoriu y Urbanismu, siguiendo’l modelu de datos definíu pol Modelu Nomenclátor del Estáu na so versión 1.2 (MNEv1.2).
 
Cada términu del Nomenclátor acompáñase, si ye’l casu, de la forma oficial anterior y de les variantes toponímiques que se constaten. Coles mesmes, índicase la posición xeográfica de cada topónimu espresada mediante dos coordenaes sistema de referencia determináu, permitiendo d’esti mou la llocalización y integración con cualquier otra información xeorreferenciada –cartografía, ortofotografía, redes de carreteras…–. El propósitu d’esti proyeutu ye facilitar a tolos usuarios –alministraciones, medios de comunicación, empreses, asociaciones... – un acceso rápidu y efeutivu a la toponimia oficial d’Asturies, pa lo que se proporciona la consulta en formatos como Pdf, Excel, Acces y Google Earth. De momento, namái disponible la toponimia oficial de Xixón, anque dende Política Llingüítica anuncien que van xubise de manera progresiva los datos del restu de conceyos que tiene aprobaos el so Decretu d’Oficialización.