Cascos diz qu'Asturies nun sólo cumple cola estabilidá presupuestaria, sinón qu'amás tien superávit

El presidente en funciones d'Asturies, Francisco Álvarez-Cascos dixo esti martes qu'Asturies nun sólo ta cumpliendo la normativa de la Llei d'Estabilidá Presupuestaria, sinón qu'amás tien nesti momentu un superávit nes sos cuentes, frutu de los "retayos" que realizó'l so Gobiernu y de la situación de prórroga presupuestaria que nun peermite gastar. Otres comunidaes, dixo, yá anunciaron sicasí que nun piensen cumplilu.
   "Tamos cumpliendo de sobra", dixo Cascos nuna entrevista na COPE recoyida por Europa Press, na que volvió refugar dafechu la nota de prensa emitida pol Ministeriu de Facienda esti sábadu na qu'anunciaba una posible tutela de les cuentes asturianes.
   Cascos, que recordó qu'Asturies envió'l so Plan Económicu Financieru 2012-2014 al Ministeriu'l pasáu vienres, xustificó asina que se dirixiera per carta a la Comisión Europea pa dicir que'l conteníu d'esa nota de prensa ye falsu. "Ye nel usu lexítimu de defensa, polo qu'acudimos a les instancies europees", dixo, insistiendo en qu'a Asturies ta perxudicándola la amenaza de Facienda. Por eso, tamién xustificó'l so pidimientu de que Mariano Rajoy pida disculpes.
   Critica'l presidente asturianu que'l departamentu de Montoro nun dea razones económiques, sinón polítiques, col argumentu de la inestabilidá política n'Asturies. Ye algo que refuga, porque recuerda que la próxima selmana Asturies va formar Gobiernu. Y porque hai otres comunidaes como País Vascu que tienen una situación peor nesi sen.
SITUACIÓN ECONÓMICA D'ESPAÑA
   Más a nivel xeneral, y sobre les males noticies qu'afecten a la economía d'España, Cascos dixo que'l Gobiernu estatal tendría que poner sobre la mesa un "plan seriu" de reformes y esplicalu a la sociedá y a la Unión Europea. Eso sería "más firme" que les "reformes parciales" que va anunciando "por entregues" cada selmana'l Gobiernu de Rajoy.
   Dixo qu'antes de les últimes elecciones xenerales xeneróse un escenariu "demasiao simple" cuando se crearon espectatives consistentes en qu'un simple cambiu de Gobiernu resolvería los problemes d'España. "Comprobóse qu'hai que facer más coses que cambiar les sigles o les persones, porque los cambios siguen teniendo un componente d'improvisación continuu", llamentó.