Saavedra asoleya en TermAst una propuesta de terminoloxía de Teoría de la Lliteratura

La octava propuesta de TermAst yá ye una realidá. L’escritor y músicu Ricardo Saavedra asoleyó un documentu con términos venceyaos a la Teoría de la Lliteratura, el primeru que s’espubliza no que va del 2012.

‘Acentu’ ye la primer pallabra d’una llista de cerca de 400 términos na que tamién atópense pallabres como ‘isocranía’, ‘octosílabu’ o ‘zéxel’, ente otros. Una ferramienta mui útil pa dar clase de Teoría de la Lliteratura o Historia de la Lliteratura, amás d’una iniciativa afayadiza p’averar estos términos tán específicos a los falantes.

TermAst trátase d’una iniciativa conxunta de l’Academia de la Llingua Asturiana (ALLA), el Colexu Oficial d’Inxenieros n’Informática del Principáu d’Asturies y del coleutivu Softastur qu’espubliza propuestes terminolóxiques feches por especialistes col oxetivu de dar solución a los problemes qu’atopa l’asturianu n’estayes del ámbitu científicu o de les nueves teunoloxíes, ente otros. D’esta forma, los usuarios pueden familiarizase con este pallabres y aceptales o refugales pal so usu. De momento, yá tan espublizaes propuestes sobre términos básicos d’Economía y Empresa, Xurídicos y Alministrativos, Matemáticos, Médicos, Postales, Físicos y Educativos, a los que se sumen agora los de la Teoría de la Lliteratura de Saavedra.