Foro afirma que 334 sufraxos emigrantes proceden de persones que nun solicitaron votar

Un total de 334 de los sufraxos exercíos por emigrantes nes eleiciones proceden de persones que nun solicitaron el votu, según afirmó Foro esti llunes. El partíu de Francisco Álvarez-Cascos treslladó esti datu al Tribunal Constitucional.
 
El direutor de la campaña eleutoral pasada de Foro de Ciudadanos y senador, Isidro Martínez Oblanca, y la representante xeneral de la candidatura na cita coles urnes del 25-M, Lourdes Fuencisla Álvarez, anunciaron que 334 votantes del CERA nun figuren na rellación facilitada pola Oficina Provincial del Censo de los que rogaren el votu. Esti númberu, 334, "coincide casi de manera esacta col de los votos recibíos de forma direuta na Junta Electoral Provincial ensin pasar peles delegaciones diplomátiques y consulares, y que los interventores de Foro intentaron, ensin ésitu, que nun s'entemecieren col restu de los votos emitíos de manera correcta", dixo Martínez Oblanca.
 
Foro entrúgase qué comprobación fixo la Junta Electoral Provincial p'acreditar, como establez la llei, que, amás de figurar inscritos nel CERA, solicitaren en tiempu y forma’l votu a la oficina del Censu pa que namás estos votos se computen. "¿Cómo recibieron dichos eleutores les papeletes y el sobre de votación, los certificaos de tar inscritos nel Censu y los dos sobres que deben d'utilizar pa introducir tola documentación?", tamién pregunta'l partíu d’Álvarez Cascos, o "¿qué procedimientu siguieron pa emitir el so votu los 334 eleutores que, según la documentación de la Oficina Provincial del Censo, nun lo solicitaren o rogaren?".
 
 Hai que destacar que 86 de los 334 votos irregulares detectaos por Foro son de la circunscripción occidental, la que tovía tien un diputáu baillando que podría dir pal PSOE o pa Foro, por 161 de la oriental y 87 de la oriental. La formación que mantién el Gobiernu en funciones del país presentó una alegación por esti motivu’l sábadu ante'l Constitucional, dientro del plazu establecíu nel procedimientu del recursu ante esti tribunal polos votos emitíos irregularmente na mesa del CERA con ocasión de la contestación a los recursos d'amparu presentaos por PSOE, IX y Francisco González (PSOE). Éstos presentáronse contra una sentencia del Tribunal Superior de Xusticia d'Asturies (TSXA) que daba la razón a Foro, y que declaraba la nulidá del escrutiniu de la mesa d'electores de la CERA, ordenando la repetición d'esa votación na circunscripción occidental.
 
Martínez Oblanca tamién dixo, que con independencia de la alegación presentada y del so calce procesal ante'l Tribunal Constitucional, los servicios xurídicos de Foro tán estudiando toles aiciones que pudieren corresponde-yos pa "esclarar estos fechos y, nel so casu, esixir les responsabilidaes que pudieren derivase de los mesmos". El descubrimientu d'esos 334 votos llega, según esplicó’l senador, depués d'un llabor "trabayosu" del so partíu. Dende'l 6 de marzu teníen el censu de la CERA, incluyíes les persones que solicitaren el votu, y el 16 d'abril solicitaron a la Junta Electoral Provincial el llistáu de persones inscrites nel CERA que votaron, una información que recibieron al otru día. A partir d'esi momentu, los servicios xurídicos de Foro cruzaron los datos conteníos en dambos documentos, llegando a la conclusión de que 334 eleutores que s'inclúin nel llistáu de votantes nun apaecen reflexaos nel llistáu del CERA.
 
La Junta Electoral Provincial niega qu’hubiere irregularidaes
 
Fontes de la Junta Electoral Provincial consultaes por Europa Press negaron esti llunes qu'esistiera cualquier tipu d'irregularidá en rellación al votu emigrante y negaron de forma categórica qu'hubiera votantes que nun cumplieren col requisitu llegal de solicitar el votu. En rellación a los 332 votos que llegaron a Asturies per corréu, ensin pasar peles oficines consulares o diplomátiques, tal como establez la llei, afírmen que "toos cumplieron col requisitu del votu rogáu".