Bloque y UNA entamen un procesu xunitariu que va terminar el 23 de xunu nun Conceyu Fundacional
|
7 Mayu, 2012 por Redacción
- Inicie sesión o rexístrese pa espublizar comentarios
Manuel Benayas y Yolanda Huergo, voceros de la coalición Bloque-UNA, anunciaron l’entamu d’un procesu xunitariu que va terminar el 23 de xunu nun Conceyu Fundacional. Ta abiertu un censu pa tolos interesaos en participar nel proyeutu.
Esti iniciativa, que lleva’l nome de ‘Compromisu’, busca axuntar a la cantidá de xente mayor baxo los valores de “defensa del país, la xusticia social y l’ecoloxismu”, según destaca la información apurrida poles dos organizaciones a independientes. Toles persones interaes pueden apuntase nun censu que s’abrió’l sábadu y que va pesllase’l 10 de xunu y van tener la oportunidá de participar, con voz y votu, na definición de la llinia política, estratéxica y organizativa d’esta estructura nueva, tovía ensin nome definíu.
El procesu de formación d’esta organización, que de primeres diba dar entamu en febreru y que se restrasó por mor de la convocatoria anticipada d’eleiciones, nun significa una refundación del Bloque por Asturies nin d’Unidá Nacionalista Asturiana (UNA), agrupaciones qu’impulsen esti proyeutu pa superar “marcos políticos d’anguaño” y que s’inxerten nél. Nesi sen, puntualicen que “la militancia de Bloque y UNA incorpórase individualmente, col mesmu pesu que les persones independientes que s’apunten al censu”. La coalición punxo en marcha una web con tola información sobre’l procesu, na que tamién ye posible sumase al censu pa participar el 23 de xunu nel Conceyu Fundacional.
Efrén d'Andrés
Comentarios
¿Oyistis? si esti ye l´entamu d´un Partíu Nacional Asturianu, cuntái conmigo, y con bien de xente. Agora bien: si ye inventar nueves sigles pa dar el turre colo de siempres (altermundismu, ecoloxísmu, bablegaites, bloque pal cogobiernu , con IU-FSA, bloque pal engañu, ridículu electoral, etc.) entós nada, perder el tiempu. Pidiríamos que Rafa lo dexe, qu´UNA y Bloque se fundan nun mesmu partíu onde quepian independientes de tol espectru nacionalista (Andecha, PAS y demás calabres). Pidiríamos qu´escomenzáramos a facer política en serio. Y qu´esto fuere la verdadera Xuntanza.
Discursos territorial (llendes históriques de la nación asturiana), históricu(Reinu Asturianu, secesiones medievales, llevantamientu de 1.808), llingüísticu (dominiu llingüísticu asturianu), cultural ( arreblagando llendes provinciales, llazos compartíos con otros países), drechu propiu consuetudinariu (el vezu, la costume, ordenances de la Xunta Xeneral), estructuración actual de los noyos de decisión y autogobiernu (conceyu, parroquia, Xunta Xeneral), afondamientu y actualización de maneres organizatives de trabayu comunal y/o autosuficiente (casería, andecha, sestaferia...), llazos ancestrales de relación col esterior (ámbitu européu atlánticu, franco-cantábricu y célticu). Y milenta temes más que podríemos añadir sedríen una de les bases "fundamentales y prioritaries" d'un auténticu proyectu nacional asturianu: l'afitamientu y la reivindicación arguyosa y ensin complexu nengún d'una "Identidá Nacional", l'asturiana.