Cano reclama nel Día de les Lletres Asturianes “racionalidá, planificación y xusticia” pa col idioma

La presidenta de l’ALLA, Ana María Cano, reclamó “racionalidá, planificación y xusticia” pa col asturianu nel so discursu institucional del Día de les Lletres Asturianes. Alredor de 1.500 persones participaron na manifestación previa pola oficialidá.
 
La lluvia tornó a facer presencia na marcha convocada pola Xunta pola Defensa de la Llingua Asturiana, anque nun frenó al millar llargu de persones que s’averaron a Uviéu pa demandar al Gobiernu asturianu la oficialidá del asturianu. Les úniques organizaciones que participaron na manifestación foron Andecha Astur y Bloque-UNA, anque éstos últimos con un baberu ensin firmar que namái rezaba ‘Oficialidá’. Jesús Iglesias, cabezaleru d’Izquierda Xunida, y la diputada Noemí Martín foron tres la pancarta de Comisiones Obreres Enseñanza. Tamién participaron los sindicatos FETE-UXT, SUATEA y CSI, el coleutivu Iniciativa pol Asturianu y un grupu de persones que pidíen la oficialidá pal gallego-asturianu.
 
La marcha abrióla una banderona d'Asturies, siguida d'un grupu de pandereteres que marcharon al son del so cantar a favor de la llingua asturiana. A la llegada a la plaza Porlier, llugar onde acabó la manifestación esti añu pol pasu del actu de l’Academia de la Llingua Asturiana al Teatru Filarmónica, Paula Cristóbal, de Xunta Moza, lleó un discursu nel que criticó duramente a los políticos asturianos. “Esti Día de les Lletres llega depués d’un añu de tiempu perdíu, parálisis y inmovilismu. La nuestra clas política, que nun supo qué facer coles sos atribuciones y que nun quixo cumplir los sos deberes, sigue igual que siempre”, yá sía “con unos nomes o con otros”, señaló Cristóbal, qu’añadió que “les poques novedaes, faltaría más, son pa peor; p’abrir el camín al discursu de la negación y l’odiu; pa negar la xusticia y la evidencia”.
 
La militante de Xunta Moza llamó a la ciudadanía “a trabayar pa qu’eso cambie”, “pa que l’airón de la nuestra indignación arrastre’l so inmovilismu y la so axenda oculta de desaparición de la nuestra llingua”. Darréu esixó que los gobiernos próximos cumplan cola llexislación llingüística y cola toponimia, xeneralicen la enseñanza, incorporen l’idioma a los medios de comunicación y usen l’asturianu en toles alministraciones. Tamién reclamó la reforma del Estatu d’Autonomía pa incluyir la oficialidá.
 
Actu académicu
 
Tres la intervención de Cristóbal, una bona parte de los presentes dirixéronse al Filarmónica pa presenciar l’actu de l’Academia de la Llingua Asturiana (ALLA). Dientro pudo vese nes fileres primeres, reservaes a les autoridaes, a Noemí Martín y Iglesias (Izquierda Xunida) y a Carlos Rubiera, el senador Isidro Martínez Oblanca y Inaciu Iglesias (Foro de Ciudadanos), ente otros. Sonia Avellaneda y Próspero Morán repitieron como presentadores del actu, qu’abrió Xuan Nel Expósito con una añada tradicional asturiana col acordión, a la que siguió Marisa Valle Roso con ‘Al pasar pel puertu’.
 
El secretariu de l’ALLA, Roberto González-Quevedo, abrió la xunta extraordinaria de la institución que, como novedá, nun tuvo nomamientos institucionales. “Asistimos a la celebración d’esti XXXIII Día de les Lletres Asturianes nuna situación d’esceicionalidá. Esceicionalidá que vien marcada a nivel del estáu por una crisis económica ensin precedentes na historia recién y, a nivel d’Asturies, por una crisis d’estabilidá política con perfondes implicaciones socio-económiques y culturales. Na Academia de la Llingua Asturiana somos conscientes d’esta situación y, darréu d’ello, quiximos facer un actu del Día de les Lletres non convencional”, esplicó más tarde la presidenta nel so discursu institucional. Asina, l’ALLA apostó por dar la pallabra de persones de dellos ámbitos cultural comprometíos con Asturies y la so llingua pa que reflexonaren sobre’l futuru del idioma.
 
La primera en tomar la pallabra foi la periodista Pilar Rubiera, que recordó’l so primer contautu cola llingua na so infancia en Quirós y señaló que “ensin falantes la llingua ta condergada a la desapaición, y cada vez somos menos”. El caderalgu d’Enseñances Medies, Luis Arias Argüelles-Meres, que faló n’occidental, entrugóse ú ta l’asturianu na vida pública y dispidióse con un “salú ya República” y un “llarga vida a Asturies y a les sos pallabres”. Pela so parte, la vicerrectora d'Investigación de la Universidá d’Uviéu, Paz Fernández, centró’l so discursu nel llabor de la institución universitaria pa caltener tol patrimoniu asturianu y, respeuto al asturianu, destacó que la Universidá “fixo tolo posible dientro del marcu normativu”.
 
Con un saludu n’asturianu y en bretón presentóse ante’l Filarmónica Lisardo Lombardía, direutor del Festival Interceltique de Lorient/An Oriant, que se calificó como “ciudadanu del mundu”. Lombardía fixo una defensa firme de la identidá propia y señaló que “pue facese más, abondo más, al respeuto del asturianu”, poniendo como exemplo’l llabor de recuperación que ta faciendo Breizh col bretón y el galó pese a que les lleis franceses nun reconocen la oficialidá d’otru idioma que nun sía’l francés. El siguiente en falar foi Ricardo Saavedra, músicu y escritor, que llamó a los habitantes del occidente del país a “usar as noitas palabras”. Zarró les intervenciones el matemáticu y profesor Pedro Suárez, qu’arrancó les rises de los presentes con un discursu cuidáu y prestosu. Nél amosó que ye posible “impartir una clase de matemátiques n’asturianu” y afirmó que “la oficialidá nun pue esperar más”.
 
Darréu, Cano lleó’l discursu institucional, nel qu’agradeció a les seis persones qu’intervinieron nel actu “poles sos aportaciones y pola sinceridá y valentía con que les planteguen”. La presidenta de la institución académica faló de la crisis, que llevó al Gobiernu a recortar nun 40 por cientu el presupuestu de l’ALLA, y demandó “proporcionalidá” en casos como’l de l’Academia. “Dende equí pidimos a los nuevos dirixentes políticos del Principáu que se rectifique una decisión presupuestaria dafechu inaceptable”, aseguró.
 
“Necesitamos racionalidá, planificación y xusticia”, demandó Cano pa col asturianu: “Un elementu de racionalidá (ya inclusive de rentabilidá económica) ye la reconocencia de la especialidá de llingua asturiana pal profesoráu d’Educación Primaria y Secundaria; un elementu de planificación ye’l diseñu d’un verdaderu procesu de recuperación llingüística n’Asturies; un elementu de xusticia (l’únicu almisible) ye’l qu’empobine a un procesu aicionáu de reconocencia de la oficialidá de la llingua asturiana”, esplicó. Amás, afirmó que’l Gobiernu entrante “ha tener la seguranza de la nuesa llealtá porque de lo que tamos falando nun ye solo (y ello ye fundamental) del futuru económicu de nueso, sinón que tamos refiriéndonos, cenciellamente, al futuru d’Asturies como pueblu, futuru que nun ye dable sin un futuru pa la llingua asturiana”.
 
Una llectura de poemes, por parte d’Avellaneda y Morán, y una actuación de la Banda Gaites Villaviciosa, que tocó un set homenaxe a Dixebra pol 25 aniversariu del grupu avilesín, siguieron al discursu de Cano. L’himnu d’Asturies sirvió de pieslle al actu académicu.