Álvarez González diz apostar por potenciar la presencia del asturianu nos centros educativos

La conseyera d’Educación, Ana Isabel Álvarez González, dixo apostar por potenciar la presencia del asturianu nos centros educativos. Fixo estes declaraciones na presentación del llibru ‘Poesíes’, editáu por mor de la Selmana de les Lletres.
 
Álvarez González apuntó que, de gobernar el so partíu, Foro de Ciudadanos, apostaría por potenciar la presencia del idioma nes escueles y por caltener "tolo rellacionao cola realidá asturiana”. Tamién que los recortes nun van afeutar a la enseñanza del idioma porque "nun tienen que ver con una llinia educativa precisa, sinón con otres cuestiones rellacionaes con ratios o hores". En too casu, la prioridá del Gobiernu de Foro nesta materia va ser "la homoxeneización del profesoráu", dixo. Trátase de llograr que les especialidaes docentes tengan el reconocimientu que precisen pa que'l profesoráu pueda caltenese "de forma estable" nos centros con "les meyores condiciones posibles" y que, amás, les programaciones se desarrollen "de la meyor manera".
 
Entrugada poles declaraciones del ministru d'Educación, Cultura y Deporte, José Ignacio Wert, qu'aseguró que sería imposible reducir el déficit ensin facer axustes nestes estayes, la conseyera dixo que ye "triste abondo que tengan que recurrir a recortes precisamente n'Educación pa compensar les cuentes". Sicasí, esclaró que desconoz les cifres macroeconómiques que manexa'l ministru pa facer eses declaraciones.
 
Testos entendibles
 
Nel actu de presentación del llibru 'Poesíes' de Benito de l'Auxa y Antón Balvidares, editáu por cuenta de la celebración de la XXXIII Selmana de les Lletres Asturianes, tamién asistieron el conseyeru de Cultura y Deporte, Emilio Marcos Vallaure; el rector de la Universidá d'Uviéu, Vicente Gotor; y el profesor Xuan Carlos Busto, que s'encargó de la edición, la introducción y les notes del volume. Nél, Busto intentó reflexar la forma d'escribir de dambos, n'asturianu cultu, y respetar les referencies históriques y xeográfiques qu'utilizaben los autores, venceyaos a Xovellanos.
 
De L'Auxa y Balvidares elevaron, al so xuiciu, la llingua asturiana a un nivel "bien altu" y, por ello, la Selmana de les Lletres Asturianes rindió-yos homenaxe. El trabayu pa ellaborar esti llibru requirió, según Busto, investigar en biblioteques y trescribir manuscritos. Too ello pa llograr unos testos "que s'entiendan" y que "xente con una cultura media pueda lleer". Polo xeneral, el procesu foi "mui prestosu" porque "son testos simpáticos" qu'introducen a los que los manexen nun mundu colorista".
 
Na semeya, Marcos Vallaure, Gotor y Busto, nel actu de presentación del llibru 'Poesíes'.