TeleAsturias retrasa al vienres la emisión de la versión asturiana del clásicu del western ‘McLintock’

L’estrenu de ‘McLintock’ n’abiertu pol TeleAsturias va retrasase al vienres por decisión de la canal. El programa especial nel que s’inclúi la versión asturiana d’esti clásicu del western va principiar a les 21 hores.
 
Mentes, la redifusión prevista pal domingu de la presentación de la película y el so doblaxe y la so emisión, mantién la hora anunciada nun primer momentu: les 15.30 hores. Les persones que nun tengan sintonizada la canal pueden atopala nel dial 66 de la TDT, mentes que la xente que nun resida n’Asturies va poder ver ‘McLintock’ al traviés d’Internet.
 
Esti filme dobláu al asturianu por Gonzali Producciones fala de la historia d’un terrateniente machista d’Arizona abandonáu pola so muyer por sospeches d’infidelidá que vuelve a atopar a lo so ex esposa años depués en casa d’una fía común tres conocer que ta prometida con un mozu. Ello provocará engarradielles ente ellos y una bona riestra de situaciones divertíes. Los encargaos de poner voz a los personaxes de ‘McLintock’, dirixíos pol actor y direutor escénicu Antón Caamaño, foron el propiu Caamaño (John Wayne), Mayra Fernández (voz de Maureen O’Hara), Carlos Alba, Fernando Marrot ‘Win’, Inma Rodríguez, Rodrigo Alba, Fernando de Luxán, Eladio Sánchez, Norberto Sánchez, Arantxa Fernández, Armando Felgueroso, Alberto Álvarez Peña, Carlos González, Hugo Costa y Jessica M. de la Paz, ente otros.