Arranca la XXXIII Selmana de les Lletres Asturianes cola presentación de ‘Al rodiu de la poesía ilustrada’

El Muséu Casa Natal de Xovellanos acoyó esti llunes la inauguración de la XXXIII Selmana de les Lletres Asturies, dedicada a Benito de l’Auxa y Antón Balvidares. Nel actu presentose’l volume ‘Al rodiu de la poesía ilustrada’.
 
La música d’un duu de cuerda precedió a les intervenciones de les autoridaes, con ausencies destacaes. Carlos Rubiera, conceyal d’Educacación, Cultura, Mocedá y Festexos, acudió al actu en sustitución de l’alcaldesa, Carmen Moriyón, mentes qu’Ana Isabel Álvarez González, conseyera en funciones d’Educación y Universidaes, escusó a Emilio Marcos Vallaure pola muerte d’un persona venceyada al Muséu de Belles Artes. El primeru en tomar la pallabra foi Rubiera, que fixo referencia al llugar de la presentación, la casa natal de Gaspar Melchor de Xovellanos, “onde se falaba davezu n’asturianu”, como amosaba la carta en castellanu que l’ilustráu xixonés unvió nel 1791 al so hermanu Francisco de Paula. “Xovellanos falaba davezu na llingua del país”, continuó’l conceyal, “al igual que la clase ilustrada, ensin complexu y vergoña”, pa depués recordar l’enfotu de Gaspar Melchor y la so hermana pequeña Xosefa pa cola llingua asturiana. Tamién fixo referencia a los dos poetes a los que ta dedicada la Selmana, L’Auxa y Balvidares, ilustraos “que falaben y escribíen na llingua del país”, a la que definió como “un estraordinariu patrimoniu de la humanidá”.
 
Tres Rubiera, intervino Alfredo Ignacio Álvarez Menéndez, direutor de Política Llingüística, que recordó “el terciu de sieglu” que cumple la Selmana de les Lletres Asturianes y faló de la vida y obra del candasín L’Auxa y el sareganu Balvidares, que vivieron nuna época na que “l’asturianu ye entá mayoritariu, pero arrequexáu yá pola diglosia” que provocaría “la quiebra que dos sieglos depués” llevaría a los asturianos “a perder la so propia conciencia idiomática”. Pa zarrar, Álvarez Menéndez aseveró que “Asturies tien que xorrece ensin perder el respetu a si mesma, a la so cultura y a les sos tradiciones”.
 
Álvarez González, pela so parte, destacó’l trabayu desendolcáu en comuña pola so conseyería cola de Cultura y Deporte cola fin de “caltener a una llingua asturiana viva cada día”, col exemplu de la Selmana de les Lletres Asturianes, “tiempu de celebración, a la vez que de reflexón”. Tamién falo de la importancia de la Ilustración y del papel de los asturianos ilustraos, temática que toca’l volume coordináu por Juan Carlos Villaverde Amieva y Javier González Santos, profesores de la Universidá d’Uviéu y miembros del Seminiariu de Filoloxía Asturiana, de nome ‘Al rodiu de la poesía ilustrada’. Ésta ye, xunto a ‘Poesíes’, una de les dos obres espublizaes pol Gobiernu d’Asturies pa esta selmana dedicada a les lletres asturianes.
 
El direutor de Política Llingüística destacó la collaboración importante del Seminariu de Filoloxía Asturiana pal desarrollu d’estos trabayos. “La Universidá asume esti papel de liderar lo que ye la investigación filolóxica, lliteraria y llingüística del asturianu”, señaló Álvarez Menéndez enantes de que Villaverde falara de ‘Al rodiu de la llingua asturiana’, llibru que reflexona sobre esta dómina al traviés d’artículos de Lucía Fernández Secades, Joaquín Ocampo Suárez-Valdés, Santos M. Coronas González, Juan José Tuñón Escalada, Xuan Carlos Busto, Marta Mori, González Santos, Gerardo Díaz Quirós y Francisco Crabiffosse Cuesta. El preámbulu lleva la firma de Marcos Vallaure y la presentación, d’Álvarez Menéndez.
 
Actu en Grau
 
Les actividaes de la XXXIII Selmana de les Lletres Asturianes van continuar esta tarde (20 hores) en Grau, na capiella de los Dolores, con una representación teatral de ‘Píramo y Tisbe’, de L’Auxa, fecha por Producciones Nun Tris, y un actu poéticu n’homenaxe al candasín y a Balvidares, cola participación de Xuan Carlos Busto y Sofía Castañón. Esta actividá desendólcase en collaboración cola Fundación Aula de les Metáfores.
 
Na semeya, Villaverde, Álvarez González, Rubiera y Álvarez Menéndez, aplauden una de les intervenciones del duu de cuerda.