Personalidaes de la cultura roblen un manifiestu contra l’ataque al asturianu nos Premios de la Crítica

Más de 250 ciudadanos y personalidaes de la cultura y roblaron un manifiestu contra l’ataque al asturianu nos XIII Premios de la Crítica. Reclamen que l’Asociación d’Escritores d'Asturies rectifique na so decisión d’arrequexar la llingua asturiana.
 
Según reza’l manifiestu, la decisión del coleutivu convocante de los Premios de la Crítica significa “apartar ya negar reconocimientu a una parte de la realidá asturiana. La industria editorial n'asturianu goza de prestixu tanto dentro como fora d'Asturies, y ente les voces más reconocíes ya imprescindibles del panorama lliterariu asturianu alcontramos nomes cuya carrera ta vinculada a la llingua asturiana. La lliteratura asturiana d'anguaño nun podría entendese ensin l'aportación d'estos/es escritores nin ensin la presencia de la llingua”. Tamién refuga les escuses daes pol presidente de l’Asociación d’Escritores d’Asturies, Mariano Arias Páramo, que s’escudaba na crisis y nuna supuesta baxa producción lliteraria na llingua del país pa xustificar la decisión de retirar los gallardones a los llibros n’asturianu.
 
“Desgraciadamente tamos acostumaos a que s'use la crisis como sida y escudu pa esconder les verdaderes intenciones idolóxiques qu'enmazcaren les midíes que se suelen tomar pa combatila. Los/es actores de la realidá lliteraria y cultural fecha n'Asturies y n'asturianu nun mos dexamos engañar énte argumentos tan infantiles, y entendemos esta midida como lo que realmente ye: un ataque a la llingua asturiana y una falta de respetu a los/es escritores nesti idioma”, continúa’l manifiestu, que considera esta situación creada como “un intentu d'enfrentar a los/es autores”. Por último, los firmantes piden a l’Asociación d’Escritores d’Asturies que “rectifique en ficies de que la mayoría los/es socios/es d'esa asociación, munchos d'ellos/es escritores en llingua asturiana, nun comparten la decisión nin los argumentos que la sustenten”.
 
Refugu tamién de l’ALLA
 
L’Academia de la Llingua Asturiana (ALLA) tamién refuga’l determín de l’Asociación d’Escritores de dexar fuera les obres n’asturianu de la decimotercer edición de los Premios de la Crítica “baxo la xida de la crisis y del númberu pequeñu d'obres presentaes, daqué qu'escuende detrás una nueva amuesa de la minusvaloración y despreciu a la llingua asturiana y a la so producción lliteraria”.