Xera prepara un espectáculu novedosu en soníu 5.1 pa presentar el so trabayu nuevu, ‘Llume’

El Centru Cultural Internacional Avilés ye’l llugar escoyíu por Xera pa presentar el 14 de xunetu’l so trabayu nuevu, ‘Llume’. L’espectáculu va desendolcase en soníu 5.1, dalgo novedoso n’Asturies, y va grabase pa la so difusión posterior.
 
Recrea ta collaborando na producción d’esti conciertu con esti sistema de soníu multicanal que va proporcionar al espectador una esperiencia nueva que complementa a la puesta n’escena impecable del grupu, apartáu na que tamién va haber novedaes. Amás, Xera promete pa esti espectáculu delles sorpreses y collaboraciones. De momento, ta confirmada la presencia de la Banda Gaites La Raitana y la seición Aurum del coru Los Peques del León de Oro, de Ḷḷuarca, nel auditoriu del Niemeyer. L’entamu de l’actuación –que va ser grabada pola productora Señor Paraguas– ta previstu pa les 20 hores y el preciu de les entraes ye de 10 euros. Éstes yá tán a la venta en tiquExpress, los caxeros de Caxastur, en Llaboral Ciudá de la Cultura y nel propiu centru avilesín. Amás, tamién pueden mercase per teléfonu nel 902 106 601.
 
‘Llume’ ye’l tercer trabayu de la banda de folk-electrónicu tres ‘Lliendes’ (2006) y ‘Tierra’ (2009). Ésti saldrá a la venta a primeros de branu y destaca pola participación de Martin Russell, téunicu d’Afro Celt Sound System, que va encargase del master. Tres la presentación n’Avilés, Xera va dar a conocer esti discu per toda Europa. De momento, yá tienen confirmaes trés feches en Breizh p’agostu: dos nel Festival Interceltique de Lorient/An Oriant y otru en Kemper.