Xune Elipe: “Cuento con poder tocar nel Conciertu de la Oficialidá”

El 28 d’abril va celebrase’l XXIV Conciertu pola Oficialidá, que se presentó esti vienres n’Uviéu con una representación de los músicos que van tomar parte nél. “Cuento con poder tocar con Dixebra nel Conciertu de la Oficialidá”, afirmó Xune.
 
El xixonés Parque Inglés, agora bautizáu como Parque de los Hermanos Castros, ye’l llugar escoyíu por Xunta Moza, estaya de mocedá de la Xunta pola Defensa de la Llingua Asturiana, pa instalar la carpa na qu’esti añu va celebrase esta cita fixa nel calendariu qu’ufre más d’ocho hores de música n’asturianu con una bayura grande d’estilos. “Nun va haber naide al que, al menos, nun-y guste una de les siete bandes que toquen. Ye un cartelazu y tamos mui contentos por ello”, afirmó Llucía Menéndez Suárez, de Xunta Moza. Asina, nesta edición, por orde d’actuación, van participar nesta folixa reivindicativa De Miguel, Wolfe y Quintana, cola so fusión de jazz y música tradicional; Macadamia y la so apuesta novedosa; el tríu de folk acústicu Tuenda; La Bandina, col so folk baillable; el cantautor d’Alfredo González; Dixebra, col so rock combativu; y Fala Non Caduca, que va zarrar el conciertu cola so mecigaya punk-rock y ska
 
“Queremos agradecer a los músicos asturianos la collaboración que vienen faciendo con nosotros históricamente, siempre dispuestos y encantaos en participar nesti conciertu de manera desinteresada”, señaló Ménendez Suárez, que destacó l’esfuerzu que fai la organización pa entamar esti eventu, con un presupuestu cercanu a los 20.000 euros. Al igual que n’años anteriores, van mantenese los dos escenarios pa que la música nun s’interrumpa en nengún momentu, y la barra con precios populares. Como novedá principal, Xunta Moza va rifar ente tolos asistentes una fin de selmana pa dos persones n’Asiegu (Cabrales), premiu qu’inclúi l’agospiu, una caxa sidra y la Ruta del Quesu y la Sidra. Por últimu, dende Xunta Moza resaltaron que “ye mui triste, depués de 24 años, siguir faciendo esti Conciertu pola Oficialidá” y reivindicaron un 25 aniversariu del eventu nel que poder celebrar “el Conciertu de la Oficialidá”.  
 
Nesi mesmu sen manifestóse Xune Elipe, qu’afirmó que “cuento con poder tocar con Dixebra nel Conciertu de la Oficialidá; non nel de pola Oficialidá". La so banda, qu’esti añu cumple 25 primaveres, mantién el récord de participaciones nesta folixa, con 22. “Namái faltamos en dos ocasiones: una vegada porque teníamos xente fuera y l’añu pasáu porque tocábemos en Zaragoza”, recordó’l cantante y fundador d’esti grupu tán venceyáu con esti conciertu, yá que “surdió de dientro de Dixebra. El primeru foi n’Avilés entamáu pola Xunta pola Defensa de la Llingua d’Avilés, que d’aquella yeremos casi toos músicos. Decidimos que como n’Uviéu taba la manifestación y en Xixón los Premios Andrés Solar, yera bono facer una actividá na ciudá. Lo que nun pensaramos ye que 24 años depués dibemos tener que siguir tocando nel Conciertu pola Oficialidá”.
 
Nel lláu positivu, Elipe destacó que’l conciertu “convirtióse nun escaparate de la música fecha n’Asturies y n’asturianu per onde pasaron prauticamente la totalidá de los grupos que cantaron nesta llingua”. “Ye una manera de facer visible la reivindicación de la oficialidá, sobre too nun sector que ye importante na tresmisión del idioma como ye la mocedá”, añadió’l vocalista de Dixebra. Por último, fixo referencia a que la normalización llingüística n’Asturies “ta produciéndose paralela a lo que son les decisiones polítiques. L’Alministración va per un lláu, pero la normalización tán llevándola a cabo organizaciones cíviques, organizaciones populares, y eso da’l movimientu muncha fuercia y consistencia, independientemente de los aciertos o de los desastres que pueda tener políticamente l’asturianismu”.
 
“L’añu más interesante no musical”
 
Xosé Antón Fernández ‘Ambás’, pela so parte, destacó’l compromisu de los músicos que faen música n’asturianu y llamentó “la situación complicada del idioma, y más nestos momentos de crisis, nos que lo que más sufre ye la cultura. Por eso tenemos que tar más fuertes y más xuntos que nunca, con un compromiso mayor”. Sobre’l cartelu d’esti añu, el cantante de Tuenda, que tamién tocara en delles ocasión con N’Arba nesta folixa, dixo que “ye mui guapu, con una representación variada de lo que ye’l panorama músical asturianu. Quiciabes ye l’añu más interesante no musical porque pasa per una pila estilos y toos n’asturianu”. Pa finar, Ambás recordó "que lo que normaliza l'idioma ye falalo. La oficialidá ye un pilar básicu, pero nun va salvar la llingua. Eso queda en manes de la xente".
 
Mentes, Michael Lee Wolfe auguró una presencia importante de xente na carpa del Parque Inglés y deseyó que “la xente n’Asturies empiece a xulgar lo que-yos presta y lo que non, más allá del idioma”. Tamién que disfrute “del cartel estupendu” que la Xunta Moza preparó pal sábadu próximu. “Esti añu’l conciertu tien mui bona pinta, con instrumentistes d’una gran calidá, y el preciu ye perfeutu pa enllenar la carpa”, aseguró.
 
L’entamu de les actuaciones a previstu pa les 19.30 hores y el preciu de les entraes ye de 8 euros, anticipada, y de 10, na puerta. Los puntos de venta son: Café Trisquel y Barucu (Xixón); Malayerba y L’Esperteyu (Uviéu); El Cafetón (Avilés); La Gueta (Candás); Mesón Cervantes (Tinéu); El Azul (Cangas); L’Abellugu (Mieres); La Palmera (La Pola Ḷḷena); Abre César (La Pola Siero); Pub Piero’s (Grau); La Naveta (Nava); y el CSOA La Semiente (L’Entregu).
 
Na semeya, Andrés Rodríguez Monteavaro y Llucía Menéndez Suárez, de Xunta Moza; Xune Elipe; Alfredo González; Michael Lee Wolfe; Jacobo de Miguel; y Xosé Antón Fernández 'Ambás'.