Iniciativa pol Asturianu reclama a la organización de la Vuelta a Asturies l’usu de la toponimia oficial

La Vuelta a Asturies, que va celebrase del 27 al 29 d’abril con namái trés etapes, incluyía la Xuba al Naranco, nun respeta la toponimia oficial. Dende Iniciativa pol Asturianu reclamen el cumplimientu de la normativa.
 
El coleutivu que trabaya pola normalización de la llingua del país, punxóse en contautu cola organización de la LVI Vuelta a Asturies-Julio Álvarez ‘Mendo’ y cola Direición de Política Llingüística pa tresllada-y el so malestar por esta situación. “Nun podemos entender como la Vuelta a Asturies fai un usu incorreutu de la toponimia nos llugares pelos que pasa (Gijón/Xixón, La Pola Siero, Piedrasblancas, Llastres, El Fitu, Llugones, Mucó, etc.) cuando son les úniques formes oficiales, y amás, la Vuelta a España, organizada dende fuera d’Asturies, yá anunció que diba usar de forma normal”, afirmen dende Iniciativa pol Asturianu. Nesi sen, hai que destacar qu’Unipublic, empresa organizadora de la ronda ciclista estatal, pese a que se comprometiera en xineru a utilizar la toponimia oficial, continúa manteniendo la castellana na páxina web de la carrera.
 
Otra manera, Iniciativa pol Asturianu tamién solicita l’usu de la llingua, “como eventu organizáu n’Asturies”, na cartelería y publicidá, asina como nel nome de la prueba. “Sedría un xestu mui bien recibíu polos asturianos qu’ayudaría a promocionar l’usu del asturianu nel ámbitu deportivu, nun campu, como’l ciclista onde l’asturianu siempres tuvo mui presente”. Por último, como ye vezu, el coleutivu ufrió la so collaboración p’asesorar en materia llingüística.
 
13 equipos confirmaos
 
La Vuelta Asturies confirmó la participación de más de 100 corredores pertenecientes a 13 equipos. Ente los que yá aseguraron la so presencia nesta carrera histórica tán el Movistar, l’Euskaltel, l’Andalucía, el Caja Rural, el Burgos BH, l’Orbea, l’EPM-UNE (Colombia), el Start Cycling (Arxentina), el Cofidis (Francia), el Lokosphinx (Rusia) y l’Onda Boavista (Portugal), amás de les seleiciones d’España y Arxentina.
 
La ronda va principiar el vienres 27 con una etapa ente Uviéu y Xixón. Pal sábadu ta prevista la celebración de dos sectores, el primeru dende’l Parque de la Prehistoria (Teberga) hasta’l Centru Cultural Internacional d’Avilés, y, yá pela tarde, una contrarreló individual per Piedrasblancas. Por último, el domingu 29 va tener llugar la XLVI Xuba al Naranco, prueba que queda integrada dientro de la Vuelta a Asturies.