Foro y PP alcuerden votar xuntos na sesión d'investidura, anque nun adelanten el nome del candidatu

Mercedes Fernández confirmó esti martes que la so formación y Foro de Ciudadanos alcordaron votar xuntos na sesión d’investidura, pero nun adelantó quién diba a presentase a la presidencia del país. “Eso queda abierto”, dixo.
 
Les declaraciones de la cabezalera del Partido Popular (PP) tuvieron llugar tres mantener una reunión de más de dos hores na Xunta Xeneral con Francisco Álvarez-Cascos, presidente d’Asturies en funciones. D’esta forma, la derecha asturiana avera postures tres delles desavencies que llevaron al llíder de Foro a convocar eleiciones anticipaes y sigue’l mesmu camín que les formaciones d’izquierda, que la selmana pasada tamién algamaron un alcuerdu pa votar xuntos na sesión d’investidura.
 
Agora, los dos bloques van trata de convencer a Ignacio Prendes, diputáu únicu d’UPyD, pa que-yos dea’l so votu y algamar asina’l Gobiernu del país. Tanto la izquierda como la derecha sumen el mesmu númberu de diputaos: 22.