General Dynamics zarra la fábrica de La Vega pa llevar la producción a la de Trubia y reducir costos

La multinacional General Dynamics, propietaria de Santa Bárbara Sistemas, anunció la so intención de zarrar la fábrica de La Vega pa llevar la producción a Trubia. Bloque por Asturies-UNA desconfía d’esta operación de la empresa.
 
La intención de General Dynamics European Land Systems ye integrar dambes fábriques pa crear sinerxes y aforrar costes al mesmu tiempu d’eliminar duplicidaes. Asina, pretender facer el procesu d’integración de les dos factoríes por etapes nos nueves meses próximos pa zarrar definitivamente la planta de La Vega. Una operación que nun ye bien vista pol Bloque por Asturies-Unidá Nacionalista Asturiana (UNA) al entender que detrás d’esta maniobra de la empresa hai intereses urbanísticos.
 
“La parcela de La Vega ye mui llambiona pensando nel sitiu onde ta y les posibilidaes d’especulación urbanística nesta zona d’Uviéu. Los eufemismos qu’usa la empresa pa tomar la decisión nun acaben de convencer. Paez que la única solución que-yos queda pa siguir cola so actividá ye xuntar dambes dos fábriques, la de La Vega y la de Trubia, y con esi xantaxe ye col que xueguen cada pocu tiempu falando de rentabilidá y de la posiblidá de la perda de puestos de trabayu”, señala la coalición nun comunicáu, nel que tamién recuerden que “les multinacionales aprovechen los tiempos de crisis pa que sigan medrando los sos beneficios”, siendo’l seutor armamentísticu ún de los que nun siente la crisis, con ganancies cada añu mayores. Por esti motivu, dende Bloque-UNA aseguren que van tar sollertes de los movimientos que dea General Dynamics y que nun van permitir “que se siga especulando” col suelu d’Uviéu “pa beneficiu d’una minoría mientres la mayoría de la población sigue pagando les consecuencies d’una crisis de la que nun tien nenguna culpa” pese a que a diaru “se nos quier convencer” de que ye “responsable”.