Los xixoneses van tener accesu de baldre a les actividaes de ‘LABoral’

El Centru d’Arte y Creación Industrial ‘LABoral’, asitiáu na Universidá Llaboral, anunció que tolos xixoneses van tener accesu de baldre a les sos actividaes. Pa ello, namái han de tener la tarxeta ciudadana, tamién gratuita.
 
Esta midida ye frutu d’un alcuerdo col Conceyu de Xixón, patronu de la Fundación la Llaboral que rixe los destinos del centru dende la so constitución. Con esta decisión, qu’entra en vigor mañana, tanto ‘LABoral’ como l’Ayuntamientu quieren favorecer l’averamientu de la ciudadanía a les actividaes y esposiciones programaes pola Fundación. Pal restu de visitantes, la entrada al Centru d’Arte mantién la tarifa de dos euros.
 
La tarxeta ciudadana ye un documentu que sirve pa identificar a los sos titulares pa trámites determinaos y p’acceder a delles prestaciones municipales específiques.  Asina permite, ente otros, facer trámites al traviés de la Oficina Virtual de la páxina web del Conceyu de Xixón y de los caxeros ciudadanos, presentar solicitúes pel Rexistru Electrónicu, obtener volantes d’empadronamientu, inscribirse en cursos culturales y deportivos, conseguir llicencies urbanístiques o reservar espacios deportivos.