La Coordinadora Ecoloxista denuncia l’usu de yerbicíes por parte de Conservación de Carreteres

El Serviciu de Conservación de Carreteres d’Asturies utilizó yerbicida nun tramu de carretera de 500 metros con viviendes de Cuideiru. La Coordinadora Ecoloxista denunció esta práutica ante la viceconseyería de Recursos Autóctonos.
 
Según recuerda la organización ecoloxista, la utilización d’estos productos ta prohibida pol Gobiernu dende’l 2008 pola so toxicidá con animales y humanos. Los yerbicíes tienen compuestos que pueden ser absorbíos pol suelu y que son solubles n’agua, “lo qu’aumenta la so peligrosidá”. “La xustificación supuesta pa estes fumigaciones ye eliminar yerba pa favorecer la visibilidá de les carreteres y reducir los riesgos d’incendiu, argumentos tan inútiles como falsos, yá que fumigaron de forma indiscriminada tol tramu con delles pasaes y el secar la yerba nun mengua’l peligru d’incendios, sinón que lo adelanta”, espliquen dende la Coordinadora Ecoloxista d’Asturies.
 
Por esti motivu y pola posibilidá de que l’usu d’estos yerbicíes afeute a vecinos y fauna del llugar, los ecoloxistes demanden al Gobiernu qu’elimine de forma mecánica aquella yerba qu’afeute la seguridá vial o como midida de prevención d’incendios. D’igual forma, reclamen información sobre qué autorización teníen los operarios pa utilizar estos productos tóxicos nun tramu de 500 metros de la CU-1 ente Cuideiru y Villamar.