Iniciativa pol Asturianu y coleutivos lleoneses aconceyen n'Estorga “pa trabayar pola llingua común”

Un delegación d’Iniciativa pol Asturianu desplazóse esti domingu a Estorga p’aconceyar con La Caleya, Furmientu y Faceira. L’oxetivu yera entamar calces de cooperación “pa trabayar pola llingua común”.
 
La reunión tuvo llugar na sede de La Caleya, onde s’intercambiaron impresiones y propuestes “pa facer una defensa unánime de la llingua qu'une a bona parte de Zamora y Lleón con Asturies”. La intención d’Iniciativa pol Asturianu con esti aconceyamientu yera “plantegar aquellos proyeutos que seyan d'interés pal idioma en dambos territorios y llevar alantre aquellos que puedan ser válidos a tol dominiu llingüísticu de manera conxunta”, cola fin de “afitar una conexón sólida con tolos territorios onde l'asturianu ye llingua propia”.
 
La vocalía de Dominiu Llingüísticu, que s’encargó d’entamar l’alcuentru, tomó nota de la situación “esmolecedora” que vive la llingua al otru llau del cordal, con una perda progresiva de falantes. L’ausencia total de lleis que garanticen los derechos d’éstos, la falta de prestixu social y de puesta en valir del patrimoniu llingüísticu y inmaterial como recursu que ye y como fonte de desarrollu social y económicu, espliquen el retrocesu que vive l’asturlleonés na zona.