El futuru de la llingua asturiana en Maxisteriu decídese nos próximos díes

Nesti momentu hai informaciones contradictories sobre la presencia de la llingua asturiana nel plan que va presentar nes próximes selmanes a votación l'equipu directivu de la Universidá, anque según  les últimes declaraciones de la directora de la escuela l'asturianu sí va tener una Mención.

Mentes que delles fontes falaben esta selmana de que la nueva propuesta de la Comisión de Gobiernu de Maxisteriu nun diba incluyir l'asturianu, anque sí diben tar presentes otres como Música, la directora de la escuela dixo ayeri al diariu La Voz de Asturias que l'asturianu sí diba tar presente como mención.
Nuna primer valoración d'urxencia fontes de la Xunta pola Defensa de la Llingua, que solicitó la presencia de la llingua asturiana "como les demás" en Maxisteriu y na enseñanza, afirmen que "si se confirma ye una bona noticia pero queden por aclarar otros temes importantes como la situación na que va quedar la llingua asturiana na educación infantil, y la necesidá de la so presencia ente les asignatures troncales".
La Xunta afaló nes últimes selmanes una campaña na que s'incluyeron concentraciones, conceyos col rector, el conseyeru de cultura y la directora de Maxisteriu, qu'acabaron la fin de selmana pasada nuna manifestación. Nestes movilizaciones xugaron un papel importante alumnos de la propia escuela de Maxisteriu y foron apoyaes polos más de los sindicatos educativos y polos profesores d'asturianu de la Universidá d'Uviéu.