L’Ateneo de Lengua y Cultura Guaraní sofita dende Paraguái la reivindicación llingüística n’Asturies

La entidá de carauter científico-cultural Ateneo de Cultura y Lengua Guaraní amosó nuna comunicación oficial la so solidaridá col movimientu asturianu de reivindicación llingüística. El 90 por cientu de los paraguayos fala esti idioma.
 
David Galeano Olivera, direutor xeneral del Ateneo, robla una carta unviada a Iniciativa pol Asturianu nel qu’amuesa la so solidaridá col movimientu de reivindicación llingüística tres conocer l’actividá que desarrolla tanto esti coleutivu como la Xunta pola Defensa de la Llingua Asturiana. El paraguayu considera’l nuesu idioma como una “valiosa, xenuina y histórica manifestación de la cultura” d’Asturies y defende que los sos falantes, responsables del so caltenimientu y tresmisión, “tienen tol derechu del mundu –como derechu humanu y llingüísticu– d’espresase na so llingua llariega”, yá que resume la “historia y manera de ser de la xente asturiano”.
 
L’Ateneo defínese como una entidá xurídica, autónoma, civil y progresista, con caráuter científico-cultural, que se fundó’l 23 de setiembre de 1985. Foi declaráu d’interés cultural-educativu pol Viceministeriu de Cultura y desendolca cursos de guaraní y actividaes de promoción cultural en Paraguái. El so oxetivu ye trabayar na investigación, recuperación, promoción, difusión, valoración, proteición y xerarquzación “constante, efeutiva y sistemática” de la llingua y cultura guaraní. Esti idioma d’orixe precolonial, oficial xunto col castellanu en Paraguái dende’l 1992, tamién se fala en zones d’Arxentina, Bolivia y Brasil y tien anguaño un total de 8 millones de falantes.
 
Dende Iniciativa pol Asturiana agradecen les pallabres de sofitu d’esta institución y quier facer pública “la nuesa más fonda simpatía faza esta llingua y cultura, símbolu d’un país tan prósimu al de nueso por razones históriques y sociales, yá que, d’igual mena qu’asocede col asturianu, nun dexa de ser patrimoniu de toos y toes, y nuesa ye la responsabilidá de nun la dexar desapaecer”.