La emigración va decidir unes eleiciones marcaes pola participación más baxa de la historia

El votu emigrante va decidir les eleiciones al tener la posibilidá de quitar un escañu a Foro pol occidente pa da-ylu a la FSA. Ello permitiría a UPyD ser llave de gobiernu y podría impidir un pautu posible de la derecha.
 
El miércoles conoceráse’l resultáu definitivu de les eleiciones tres el recuentu de los votos procedentes de la emigración. El PSOE tien opciones de sumar un escañu más pol occidente a costa de Foro de Ciudadanos, lo que permitiría a Javier Fernández buscar l’apoyu d’Izquierda Xunida y UPyD pa tener una mayoría suficiente pa gobernar el país. En total, el PSOE debería tener 177 votos más que la formación de Francisco Álvarez-Cascos na circunscripción occidental y sumar trés votos por cada uno que tenga Foro, una cantidá que superaría de repetise los resultaos de mayu: naquella ocasión, Fernández tuvo 500 apoyos por 42 de Foro. Sicasí, hai que tener en cuenta que los pidimientos d’emigrantes pa exercer el so derechu al votu baxó de 8.477 a 4.100 y que toles persones que lu soliciten nun acaben votando, como demuestra qu’hai 10 meses terminaren unviando la so papeleta 3.290 persones. Por ello, el PSOE prefier ser prudente y esperar al recuentu.
 
De dase esti cambiu con respeuto a los resultaos d’ayer, el partíu favoratible en fortalecer l’Estáu y única formación que se muestra abiertamente contraria al asturianu –“el bable/asturiano, en sus diferentes variantes, será objeto de protección. Unión, Progreso y Democracia se opone a la cooficialidad del asturiano” espón la formación de Rosa Díez nel so programa eleutoral– decidiría col so votu si la izquierda o la derecha va gobernar el país nos años próximos: PSOE y IX sumaríen 22 escaños ente los dos, los mesmos que Foro y PP.
 
Una astención del 44,08 por cientu
 
Les eleiciones del 25 de marzu del 2012 a la Xunta Xeneral, les primeres anticipaes que vive’l país, rexistraron la participación más baxa de la historia. Nunca los asturianos dieron tanto’l llombu a una convocatoria eleutoral pa decidir el presidente del país, rexistrándose 106.000 votos menos qu’hai diez meses; esto ye, se pasó d’una participación del 66,89 por cientu al 55,92, once puntos menos. Hasta la fecha, la cifra más baxa databa del 1991, cuando votó’l 58,69 por cientu del eleutoráu. La poca confianza de la ciudadanía nos políticos y la situación que llevó a la convocatoria d’esta eleiciones anticipaes espliquen el desánimu de la xente.
 
A falta namái del recuentu del votu emigrante pa decidir el repartu definitivu d’escaños, el PSOE ye’l ganador de les eleiciones al algamar el 32,01 por cientu del total de votos (159.811) tres medrar poco más de dos puntos (29,02 por cientu nel 2011). Estes cifres permiten-y a Javier Fernández sumar un escañu más, al pasar de 15 a 16. Pela so parte, Foro baxa d’un 29,66 por cientu al 24,83 por cientu (123.979) y pierde trés parllamentarios pa sumar un total de 13. Mentes, el PP nun consiguió medrar en representación pese al cambiu de candidata y Mercedes Fernández algama los mesmos escaños, 10, qu’Isabel Pérez-Espinosa. Los populares pasaron d’un 19,95 por cientu de los votos al 21,53 (107.476).
 
La xuba mayor ente tolos partíos presentaos nesta cita coles urnes foi’l d’Izquierda Xunida que, pese a la participación menor, consiguió aumentar el so númberu d’apoyos: pasó de 61.703 (10,28 por cientu) xunto con Los Verdes d’Asturies a 68.827 (13,78 por cientu) en solitariu. Asina, la coalición d’izquierdes pasa a tener cinco escaños, unu más qu’en mayu. Tamién medró UPyD, que consigue entrar na Xunta Xeneral na so segunda intentona: de 14.640 votos (2,44 por cientu) a 18.739 (3,75 por cientu). Asina, Ignacio Prendes va ser el representante de la formación nel Parllamentu.
 
No que respeuta a los resultaos de los partíos nacionalistes asturianos, éstos rexistren ún de los peores resultaos de la so historia: la coalición Bloque por Asturies-Unidá Nacionalista Asturiana-Los Verdes-Grupo Verde (Bloque-UNA-LV-GV) sumó 1.639 votos, un 0,32 por cientu, mentes qu’Andecha Astur algamó 668 (0,13 por cientu). En total, 2.307 apoyos, un 0,45 por cientu, resultaos mui asemeyaos a los que tuvo na primer convocatoria d’eleiciones pal país nel 1983 l’Ensame Nacionalista Astur (2.505 votos, un 0,44 por cientu). Les cifres algamaes pola formación rexonalista URAS tampoco foron bones al disponer de 444 apoyos (0,08 por cientu), lloñe del 0,49 por cientu de mayu que sumó en coalición col PAS.
 
La sesta fuercia del país, la primera de la llista d’organizaciones que se queden fuera de la Xunta Xeneral, foi Escaños en Blanco, iniciativa que busca recoyer tol votu en blancu col oxetivu de dexar vacíu los escaños nel casu d’algamar representación, con un 0,82 por cientu de los votos (4.095). Los resultaos del restu de partíos foron los siguientes: Equo-Los Verdes d’Asturies, 2.518 votos (0,50 por cientu); Bloque-UNA-LV-GV, 1.639 (0,32 por cientu); PACMA, 1.395 (0,27 por cientu); PCPE, 772 (0,15 por cientu); Idas-Hartos.org, 737 (0,14 por cientu); Andecha Astur, 668 (0,13 por cientu); URAS, 444 (0,08 por cientu); PDYC, 230 (0,04 por cientu); MSR, 178 (0,03 por cientu); SaiN, 176 (0,03 por cientu); UCE, 167 (0,03 por cientu); Agrupación de Electores Auseva Red, 55 (0,01 por cientu); Partido Humanista, 26; Partido da Terra Eo-Navia, 13; y Partido Familia y Vida, 5.
 
El númbero de votos en blanco y nulos tamién baxaron nesta ocasión. Nel casu de los primeros, pasaron d’un 2,60 por cientu a un 1,43 por cientu, mentes que los votos nun válidos menguaron d’un 1,44 a un 0,85 por cientu.