Iglesias destaca l’ascensu d’IX y fala d’una derecha “más débil”

Jesús Iglesias nun pudo ocultar la so satisfaición polos bonos resultaos algamaos por Izquierda Xunida, la formación que gana más votos nestes eleiciones. Tamién faló d’una derecha “más débil” que torna a tener la pelota nel so teyáu.
 
El candidato de la coalición comprometióse a siguir trabayando polos asturianos nel Parllamentu, "animáu polos resultados" de les eleiciones, "con más fuercia y compromisu". Na so comparecencia, el tamién coordinador d’IX destacó que la so formación foi "la fuercia política que más xubió" en términos absolutos respeuto a los resultaos de mayu, con 7.000 votos más. Al so xuiciu, esta situación débese a qu’IX "nun tien astencionistes", yá que con una participación menor qu’hai diez meses –casi un diez por cientu menos–, el partíu "avanzó". "Los asturianos sabíen que podíen confiar" y que la coalición "va contribuyir a que’l cielu estene", añadió.
 
Iglesias tamién fixo referencia a la fuelga xeneral convocada pa esti xueves señalando que los resultaos eleutorales d’IX son "un avance positivu” de la mesma. Otra manera, señaló que los resultados eleutorales "tornen a dexar la pelota nel teyáu de les dereches". A partir d’esti momentu y cola composición nueva de la Cámara, PP y Foro "tendránlo más difícil" qu’en mayu y, amás, "tendrán que xustificar si son capaces d’ algamar un alcuerdu y non condenar a Asturies a vivir nel deliriu", destacó.