Javier Fernández: “Tamos dispuestos a asumir la responsabilidá de gobernar Asturies”

El candidatu del PSOE a la presidencia del país, Javier Fernández, considérase’l ganador de les eleiciones. “Estamos dispuestos a asumir la responsabilidá de gobernar Asturies”, aseguró’l socialista, que tien la intención de falar con tolos partíos con representación.
 
Sonriente y arropáu por miembros de la FSA y simpatizantes, Fernández compareció ente aplausos p’agradecer la "confianza" que la mayoría de los asturianos depositaron nel proyeutu socialista, al tiempu qu’asoció’l descensu de la participación a la situación política de los últimos meses. Al respeutu, afirmó que dende’l PSOE trabayarán pa camudar la percepción que la ciudadanía tien de los políticos.
 
Tres esta xornada eleutoral, ta previsto qu’esti llunes aconceye la comisión executiva de la FSA-PSOE pa entamar "de forma inmediata" a mantener contautos col restu de partíos y a lliderar una etapa nueva que garantice estabilidá al país nun momentu nel que ye "indispensable dafechu". Sobre la posibilidá de pautu ente Foro y PP pa sumar mayoría na Xunta Xeneral y formar gobiernu, Fernández señaló que’l PSOE ye la "fuercia política ganadora" y que "los demás sabrán" lo que van facer. "Nós vamos convocar a toos y vamos falar con toos", apuntó.