Álvarez-Cascos asegura que nun va colar d’Asturies si pierde'l 25-M

El cabezaleru de Foro de Ciudadanos y presidente en funciones del país, Francisco Álvarez-Cascos, aseguró en TVE que nun va colar d’Asturies si pierde les eleiciones. Señaló que’l so oxetivu ye ganar y meyorar los resultaos.
 
"Faiga esa entruga a otros candidatos que tovía nun decididieron si dexen l’escañu de diputada o’l que puedan obtener na Xunta Xeneral del Principáu", dixo en referencia a la candidata del PP, Mercedes Fernández, nuna entrevista eleutoral nel programa de la televisión pública estatal 'Los Desayunos de TVE'. “Xuego pa ganar y col resultáu más ampliu posible", afirmó Álvarez-Cascos, qu’apuntó que Foro presentará "los mesmos presupuestos col mesmo compromisu d’axustalos a los niveles de déficit que comunique’l Ministeriu de Facienda y que nun comunicó" nel casu de renovar el control del Gobiernu del país.
 
"Nun se pue facer un presupuestu nel que’l 70 por cientu de los ingresos procede del Estáu ensin que l’Estáu ponga sobre la mesa esa partida del 70 por cientu de los ingresos", reprochó faciendo mención tanto al Gobiernu de Zapatero como al de Rajoy. "Si nun tenemos datos nuevos, será’l mesmu presupuestu", remarcó afirmando que les cuentas axustaríanse en función d’esos datos. Sobre los axustes a realizar pa reducir el déficit n'Asturies, Álvarez-Cascos calificó de "debate con poca base" pretender falar de cifres de recorte ensin poner en visu de la mesa los datos definitivos. Sicasí, fixo referencia a la necesidá d'acabar colos sobrecostos n'obres públiques, como los rexistraos na ampliación del puertu d'El Musel o na construcción del Hospital Universitariu Central d'Asturies (HUCA) nuevu, pa destinar "esi dineru que s'espilfarra" a servicios esenciales como sanidá, educación o bienestar social.
 
No referente a la posibilidá de fundir o suprimir conceyos, el líder de Foro dixo nun ser partidariu de "suprimir instituciones, y menos les llocales" que cuenten "con una llarga tradición" nel Estáu. Asina, prefier meyorar la xestión potenciando los consorcios que "sí son fieles a la tradición y respuende a esixencies actuales del Estáu". Otra manera, sobre pautos posteleutorales, refugó adelantar la so posición, señalando que dende Foro siempre tuvieron abiertos al diálogu, pero remarcando que'l compromisu del PP hasta'l momentu foi face-yos –en referencia a los asturianos– "sufrir" una alianza col PSOE. "Nós, en nengún casu, instalarémonos nel preste de PP y PSOE pa que too siga igual n'Asturies nos años próximos", recalcó a preguntes sobre si aceptaría ser el vicepresidente de Mercedes Fernández (PP).